Kabau bantiang tidak dietong, tidak manaruah kakurangan, bahati gadang tiok hari, awak baduo badunsanak, nan ketek Puti Nan Bungsu, nan gadang Magek Manandin, sadang duduak di kurisi.
Alah tibo surek panggilan, alah dibaco surek nantun, dari awa sampai akhia, sabarih tidak nan lupo, alah dipahami isi surek, dipikia-pikia dimanuangkan, surek panggilan nan baralek, galanggang Puti Nilam Cahayo, alah anam bulan galanggang rami, alah banyak Rajo nan datang, balun dapek nan ka judu, sabuang rami tiok hari.
Alah Dijalang bapak Kanduang, bakato Magek Manandin, “Manolah bapak kanduang ambo, sarato mandeh kanduang ambo, sabab ambo jalang bapak jo mandeh, taniat di dalam hati, ambo nak pai ka balai, ka galanggang Puti Nilam Cahayo, bapak lapeh jo hati suci, sarato mandeh kanduang ambo.”
Manjawab Datuak Bandaharo, duo jo Puti Linduang Bulan, “Ambo lapeh jo hati suci, jikok sampai anak ka balai, usah lamo Anak bajalan, sabagai pulo anak kanduang, jikok anak bamain judi, anak manyabuang jo badadu, usah hati dipaturuikkan, habih piti baranti main, jan sampai mambukak kain, usah sampai mambukak baju, binaso anak sabab itu, hilang rupo takucak roman.
Anak kok tidak bapakaian, urang nan tidak sagan lai, hilang bangso sabab dek itu, pikiakan bana tu Nak kanduang, jan manyasa kamudian. Rusuahkan budi kok tagadai, usah paham sampai tajua, sampai ka cucu piuik Anak, manjadi cacek kamudian.
Kini baitu lah dek anak, bajalan malah kini nangko, baoklah urai limo kaco, sarato ayam biriang balang, mamakai malah anak kanduang.”
Dilakekkan sarawa panjang, dipakai baju biludu, guntiang nan caro Sialahan, basaruang bugih sapik udang, badeta kambang palangi, tiok suduik pakai hikmah, di tangah sipalat gelo.
