Alah sudah inyo mamakai, diambiak taji sabarumbuang, dibaok ayam biriang balang, dimintak izin kapado bapak, manjawab Datuak Bandaharo, duo jo Puti Linduang Bulan, “Anak kanduang Magek Manandin, kami bari malah izin, tatapi pulo anak kanduang, iyolah Anak mambari tahu, kapado tunangan Anak kanduang, nan banamo Subang Bagelang, batunangan kain pandukuang.
Kok tidak Anak mambari tahu, tasalah kito pado adat, sungguah awak samo awak, adat nan jan ditinggakan, garak Allah siapo tahu, buruak jo baiak tak batantu, nyawo di dalam tangan Allah, elok Anak bari tahu, ka rumah tunangan anak kanduang, katokan bana elok-elok, usah lupo tantang itu.”
Kalau nan merah namonyo sago
Kalau nan kuriak iyolah kundi;
Kalau nan indah hanyolah baso
Kalau nan baiak iyolah budi.
Dari benteng ka tangsi kodok
Singgah ka balai nak rang Rao;
Kok rancak bana bungo dadok
Indak harum apo gunonyo.
Pasang palito tangah rumah
Ambiaklah lilin duo tigo;
Budi bahaso jan diubah
Kudian banyak ka gunonyo.
Manjawab Magek Manandin, “Kalau baitu kato Bapak, ambo tarimo jo suko hati.”
Bajalan Magek Manandin, alah tibo di tangah laman, bakaja cacak ateh paran, mangaja bayang-bayang gigi, gigi putiah bak camin taruih, bulu mato samuik bairiang, calak mamutuih rangkai hati.
Bakato Magek Manandin, “Adiak kanduang Bujang Salamat, Adiak ambiak malah kudo, lakekkan malah pakaiannyo.”
