Alah bajalan Si Bujang Salamat, diambiak kudo dalam kandang, alah dilakekkan pakaiannyo, maringgiah kudo nan balang, kaki nan rajah ka ampeknyo, bulu cokelat indu basanat.
Bakato Si Bujang Salamat, “Tuan kanduang Magek Manandin, Tuan naiaklah ka ateh kudo.”
Alah naiak Magek Manandin, alah dihimbau adiak kanduang, nan banamo Puti Bungsu, “Adiak kanduang Puti Nan Bungsu, adiak tingga malah di rumah, ambo ka pai hanyo lai.”
Alah dicium Si Bungsu, sadang ketek inyo baru, ayia mato badarai-darai, sanan bakato Puti Bungsu, “Kok buliah pintak ambo di Tuan, usah lamo Tuan bajalan, kito nangko bak anak balam, sikua jantan sikua batino, bapikia malah Tuan kanduang tantang itu”
Alah bajalan Magek Manandin, dihiliakan labuah nan panjang, labuah panjang basiku-siku, pudiang ameh babatang-batang, dek lamo lambek di jalan, alah tibo malah di sanan, iyo di rumah Subang Bagelang, di kampuang tajorong mudiak.
Alah baranti Magek Manandin, alah dipauikkan kudo nan balang, alah naiak inyo ka ateh rumah, dicaliak urang tidak nampak, dihimbau si Kambang Manih, takajuik Si Kambang Manih, mancaliak Magek Manandin, rancak nan bukan alang-alang, alah takana dalam hati, ikolah tunangan aciak ambo, “Oi Tuan kanduang sutan nan datang, duduaklah Tuan sabanta, nak ambo japuik aciak ambo, sadang lalok di ateh anjuang.”
Dibukak kulambu rumin, tabukak kulambu ka tujuahnyo, dibangunkan Subang Bagelang.
“Jagolah Aciak dari tidua.”
Takajuik Subang Bagelang, “Adiak kanduang Si Kambang Manih, apo sabab ambo dijagokan?”
