Manjawab Si Kambang Manih, “Kalau itu nan Aciak tanyokan, adolah urang baru datang, rancak nan bukan alang-alang, kok tidak salah mato ambo, inyolah tunangan Aciak, nan banamo Magek Manandin.”
Baru mandanga di kato nantun, takajuik Subang Bagelang, tasirok darah di dado, badan bak raso bayang-bayang, alah duduak Subang Bagelang, dirintang dayang jo panginang, mandi basiram ayia bungo.
Alah sudah inyo mandi, dilakekkan pulo pakaian, alah turun ka tangah rumah, takajuik Magek Manandin, dicaliak tunangan alah gadang, lah samo duduak di kurisi, si Kambang basiap hanyo lai, nan satangah maambiak ayia, nan satangah mamasak nasi.
Lah masak nasi dangan gulai, digulai parpati mandua, ayam sanan randang pun sanan, gulai manih di sanan pulo, alah dibaok ka tangah rumah, nasi talatak sambah tibo, “Tuan kanduang Magek Manandin, Tuan makan malah dahulu, ka mari baru sakali nangko.”
Manjawab Magek Manandin, “Adiak kanduang si Kambang Manih, kalau baitu kato adiak, tantangan minum dangan makan, kalau makan ka ubek litak, jikok minum ka ubek hauih, sabuah ambo nan takana,
Padi si jirak jiru jintan
Padi sipuluik tulang ladang;
Nasi basanduak balatakkan
Ambo bapantang makan surang.”
Manjawab Si Kambang Manih, sambia bapantun baibarat,
“Padi sijirak jiru jintan
Padi sipuluik linduang daun;
Nasi basanduak balatakkan
Jo sia Tuan ka sadaun.”
32
