Alah panek tangka batangka. Alah makan Magek Manandin, makan sasuok duo suok, cukuik katigo inyo lah kanyang.
Alah sudah makan dan minum, sudah marokok makan siriah, bakato Magek Manandin, “Adiak kanduang Subang Bagelang, sabab ambo datang ka mari, ambo nak pai ka galanggang, iyo galanggang Puti Nilam Cahayo, dunsanak kanduang Rajo Duobaleh, di ranah kampuang Singkarak, adiak lapeh jo hati suci, mintak salamaik umua panjang.”
Baru mandanga kato nantun, tamanuang Subang Bagelang, dijawab sambia manangih, “Kalau itu Tuan katokan, kok ditagah tidak tatagah, ambo suruah pai lah juo, namun sungguahpun baitu, kalau sampai Tuan ka sanan, sampai bajudi jo manyabuang, usah lamo Tuan di sanan, lakeh Tuan sugiro pulang, sabab baitu kato ambo, rajo nantun lain adatnyo, kalau bicaro di lua bana, mancancang tidak mamapeh, kok kalah pantang inyo mambayia, ingeklah Tuan tantang itu.
Sabagai pulo Tuan kanduang, kito lah lamo batunangan, tatapi kok buliah pintak ambo, elok lah ambo samo pai, kok lai namuah Tuan mambaok.”
Manjawab Magek Manandin, “Adiak kanduang Subang Bagelang, kalau itu adiak katokan, janlah adiak samo pai, sabab baitu kato ambo, bukan ambo karano malu, sabab adat di galanggang, tidak bacampua parampuan, hanyo nan banyak sabuang judi, tapuak jo sorai ado rami, parmainan anak mudo-mudo, saba lah adiak tantang itu.”
Manjawab Subang Bagelang,
“Padi sipuluik dari Jawo
Tibo di rimbo ditugakan;
Ambo manuruik tidak dibaok
Tidaklah ibo maninggakan.
34
