Bapitih sambilan pitih
Baralek sambilan jamba;
Adiak kanduang nan elok manih
Salamaik sajo malah tingga.”
Bajalan Magek Manandin, alah turun ka tangah laman, turun pulo Subang Bagelang, alah tibo di tangah laman, bakato hanyo lai, “Tuan Kanduang Magek Manandin, sabuah ambo rusuahkan, Tuan ka bajalan jauah, pacik pitaruah elok-elok.
Anak rajo di Pulau Punjuang
Balahan rajo dari Jambi
Kulambo juo Tuan pijakkan;
Sayang nan sadang bagaruntuang
Kasiah baputa dalam hati
Badoso Tuan tinggakan.
Ramilah balai Ujuang Guguak
Raminyo sadang tangah hari;
Kasiah Tuan salamo duduak
Baru tagak lupo di kami.”
Manjawab Magek Manandin, “Adiak kanduang Subang Bagelang, hari batambah tinggi juo, adiak tingga malah di rumah, usah adiak bauweh-uweh hati, iyo bana bak pantun urang,
Deta basaluak nak rang Bugih
Buatan anak Rajo Cino
Dikarang mangko dilatakkan;
Adiak nan layuak geneang manih
Lubuak hati pamenan kato
Ibolah ambo maninggakan.
Bungo harum bungo palangi
Bungo langkuweh bungo nago
Dipancuang kalam dipatagak
Dibaok nak rang Koto Tuo;
38
