Bajudi Mambaok Sansai
Kaba baraliah hanyo lai, sungguah baraliah sanan juo, aliahnyo kapado Magek Manandin, dek lamo lambek di jalan, labuah panjang baturuikkan, pudiang ameh babatang-batang, hampia ka tibo hanyo lai.
Pihak kapado lari kudo, bagai tampuruang lakak anam, pai tigo pulang pun tigo, buni gantonyo bak ditimbang, nan gadang buni manjagokan, nan ketek buni malalokkan, adang-adang baibo hati.
Jauah batambah hampia juo, alah tibo inyo di sanan, di galanggang Puti Nilam Cahayo, lah turun inyo ateh kudo, alah dipauikkan malah kudo, haru-biru urang nan banyak, mancaliak Magek Manandin, bakato urang dalam galanggang.
“Salamo hiduik ateh dunia, balun pernah ambo maliek, sutan nan sarancak nangko, laranglah puti ka judunyo.”
Sadang dek Rajo Duobaleh, mandanga urang baru tibo, lalu bakato Rajo Duobaleh, “Manolah Sutan nan baru datang, kito manyabuang agak sajamang, kalau kalah pambuang paluah, kalau manang pambali siriah.”
42
