Manjawab Magek Manandin, “Kalau baitu kato Angku, ambo cubo malah malawan, tatapi taruah tidak banyak.”
Alah dibulang malah ayam, dibulang samo-samo kanan, ayam angku Rajo Duobaleh, ayam kuriak bataji gadang, dimintak malah taruahnyo, sadang dek Magek Manandin, dilatakkan malah taruah ayam, dilatakkan limo kaco urai.
Tamanuang Rajo Duobaleh, jo apolah taruah kan di lawan, pitih tak sampai ka taruahnyo, digadaikan sawah jo ladang, dimintak tolong pado anak buah. Alah batampin malah ayam, alah balago hanyo lai, sakali mambulang naiak, duo kali mambulang turun, lah patah ayam biriang balang, basorak urang tangah balai, urang lah suko gadang ketek, lapeh utang bakaciak-kaciak, bak mandapek durian runtuah.
Tidaklah kaba dipanjangkan, lah mati ayam biriang balang, tamanuang Magek Manandin, pitih bakisa pado urang, sadang dek Rajo Duobaleh, gadang hati Allahu Rabbi, lah kayo sabab dek manyabuang, taruah disimpan hanyo lai.
Kununlah Magek Manandin, pitih habih badan lah sansai, awak disisiah samo gadang, alah bamanuang-manuang surang, tidak tantu jalan ka dituruik.
Alah dibukak kain saruang, alah digadaikan kain nantun, kapado mandeh rang balapau, dicubo pulo main dadu, dadu dipasang kalah juo, dimintak dadu pado janang, dicaliak gundu linduang merah, bataruah sakupang ganok, lah dihambuangkan malah gundu.
- Barisuak hari ka Salasa
- Urang manjamua buah palo;
- Gundu dihambuang baliak pangka
- Pitih diambiak urang juo
- Buruang di pucuak kayu mati
- Ula disasok majo lapai;
- 44
