- Ambuang dikacak gundu mati
- Koa nan tidak namuah sampai.
Tamanuang Magek Manandin, alah digadaikan pulo kudo, sakali tidak nan manang, badan batambah bansaik juo.
Tigo hari lamo di sanan, alah habih pakaian ka samuonyo, utang nasi alah banyak pulo, pitih tak ado ka pambayia, urang lah banci ka sadonyo, surang pun tidak urang nan sayang. Hari lah patang hanyo lai, alah dimintak malah nasi, kapado mandeh rang balapau, urang tak namuah manyanduakkan, bakato mandeh rang balapau,
“Mano Sutan baru datang, kalau nasi nan sutan mintak, kami tak suko mambarikan, sabab baitu kato kami,
- Cikarau di hulu ayia
- Diambiak sado nan mudo;
- Utang lamo balun babayia
- Kini lah ka tibo pulo.
Kini baitulah dek Sutan, tidak suko kami manaruah, elok bajalan kini-kini.”
Alah bajalan Magek Manandin, alah tibo di tangah laman, hari nan laruik tangah malam, ayia mato badarai-darai, buni tangih babuah-buah, bansaik nan tidak tatangguangkan, sabab dek main judi juo.
- Hilia ka labuah Rimbo Panjang
- Tikuluak jan dibasahi;
- Dahulu ditumpang hati gadang
- Kini lah badan sansai.
- Apo ka tenggang kabau gadang
- Pamatang tinggi tak tadaki;
- Apo ka tenggang di anak dagang
- Utang tak buliah mintak janji.
46
