- Gantang kanso paluiknyo loyang
- Sakalat layah pangguntiangan;
- Sadang kayo banyak nan sayang
- Bansaik lah surang manangguangkan.
- Tubuah buruak kampuang bajojo
- Dibali pandan manyalasai;
- Untuang buruak tibo di ambo
- Pitih habih badan marasai.
- Masaklah buah taruang tunjuak
- Makanan rajo di Painan;
- Barambuih angin dari rusuak
- Mangaluah bujang kadinginan.
Hari hampia badarok siang, dingin nan tidak tatangguangkan, bajalan Magek Manandin, bakain babaju tidak, tingga sarawa genggang buruak.
Alah tampak rumah sabuah, alah tibo inyo di sanan, duduak di laman urang, dicaliak kampuang sangaik rami, masuak inyo ka dalam kandang, alah duduak inyo di dalam. Sabab dek hari sangaik dingin, rangik mamakan timba baliak, lah takajuik itiak jo ayam, alah babuni itiak angso.
Takajuik urang punyo rumah, urang lah jago sakampuangnyo, alah turun urang ka laman, diliek basamo-samo, pintu kandang alah tabukak, alah tampak urang surang sajo, babaju bakain tidak, urang mamakiak hanyo lai.
Alah dihimbaukan urang maliang, bakaja urang dalam kampuang, nan hilia bakaja mudiak, nan mudiak bakaja hilia. Bakumpua urang gadang ketek, alah banyak urang di laman, alah diambiak Magek Manandin, tidak urang tanyo batanyo, alah dipatinjukan hanyo lai.
Nan surang mambaok batu, apo nan dapek digadokan, lapeh di tangan nan surang, bajawek pulo dek nan lain.
48
