- “Cingkariang jan ditutuah
- Kok tidak condong ka laman;
- Urang maliang jan dibunuah
- Kok tidak tatangkok tangan.
Urang bahimpun hanyo lai, pai maliek urang maliang, surang pun tidak urang nan tahu, bakato Rajo Duobaleh, “Mano dubalang nan barampek, cubo pandang-pandang bana, tantukan bana sia urang nantun.”
Sadang dubalang nan barambek, alah dicaliak urang nantun, alah tantu rupo jo tampannyo, bakato Dubalang nan barampek, “Ampun Tuanku rajo kami, alah kami pandang nyato-nyato, sapanjang pikiran kami, ikolah urang nan baru datang, lawan Tuanku nan manyabuang.” Bakato Rajo Duobaleh, “Mano dubalang nan barampek, elok diirik urang nangko.”
Dikabekkan Magek Manandin, bakabek jo tali gadang, dilatakkan di rumah jago. Alah sahari antaronyo, makan tidak minum pun tidak, datanglah urang surang-surang, satangah lai urang nan ibo, dicari malah pamakanan.
Alah tigo hari kan lamonyo, badan bakabek juo baru, alah pandai mangana Allah, alah takana kasalahan, dipasang niat dangan kaua, “Ya Allah Tuhanku Rabbi, kok lai babaliak ambo sehat, ambo ubah parangai lamo, ambo hantikan main judi.”
Pintak nan sadang ka balaku, Tuhan nan sadang ka mambari, alah hilang raso panyakik, alah sehat Magek Manandin, hari malam hanyo lai, dingin nan tidak tatangguangkan, manangih Magek Manandin, takana untuang parasaian,
- Ramilah balai Pasa Gadang
- Rami nan sadang tangah hari;
- Bari maaf ambo mangarang
- Kaba baraliah hanyo lai.
52
