Hukuman Rajo Kuaso
Sungguah baraliah sanan juo, aliahnyo kapado Datuak Bandaharo, duo jo Puti Linduang Bulan, salamo paningga anak, tidak ado bahati sanang, kaba tidak barito tidak, nasi dimakan raso sakam, ayia diminum raso duri, anak kanduang takana juo, rintang manangih siang malam.
Tidaklah kaba dipanjangkan, baraliah ka Subang Bagelang, tunangan Magek Manandin, hari nan sadang tangah hari, manangih Subang Bagelang, takana pulo tunangan, lah lamo raso inyo bajalan, kaba tidak barito tidak, apo ka tenggang aka ambo, ambo surang anak gadih, tidak patuik bajalan-jalan, hari lah malam hanyo lai, manangih babuah pantun,
“Dari subaliak ka sabalah
Lah bakili tapi kain
Dijahik tantang kapalonyo;
Sudah untuang takadia Allah
Dirintang bana jo nan lain
Tuan kanduang takana juo.
Anak angso di rumah gadang
Kurang dadak tumbuakkan padi
Dibari makan kaduonyo;
54
