- Disangko Tuan lakeh pulang
- Dinanti sahari lai
- Batambah jauah moh kironyo.
- Ayam kinantan putiah cotok
- Disabuang nak rang Koto Tuo;
- Bagai gunuang Tuan diharok
- Iko malah ka balasannyo.
- Bacincin parmato intan
- Patah tatimpo ateh kaco;
- Sadang kasiah Tuan bajalan
- Bahati saba malah ambo.
- Simpang Tanang tabeknyo runtuah
- Badakek jalan ka parik;
- Dalam sanang manaruah rusuah
- Rumik batenggang dalam raik.”
Hari lah badarok siang, lah kiro-kiro pukua anam pagi, kaba baraliah hanyo lai, sungguah baraliah sanan juo, aliahnyo kapado Rajo Kuaso.
Alah sudah makan dangan minum, bajalan Rajo Kuaso, dihiliakan labuah nan panjang, dek lamo lambek di jalan, tidaklah kaba dipanjangkan, alah tibo malah di sanan, di ranah di Sandiangbaka, di rumah Puti Linduang Bulan.
Bakato Rajo Kuaso, “Adiak kanduang Si Linduang Bulan, duo jo Datuak Bandaharo, bari luruih ambo batanyo, Si Buyuang dima nyo kini, nan banamo Magek Manandin?”
Manjawab Puti Linduang Bulan, “Kalau itu Tuan tanyokan, itulah nan kami rusuahkan, siang malam bahati mabuak, si Buyuang Magek Manandin, inyo kan pai ka galanggang, ka galanggang Puti Nilam Cahayo, pasan tidak barito pun tidak, antah bak mano lah tu kini, ramuak raso paratian.”
56
