nan tidak tatangguangkan, ikolah rupo paneh hari, mamak irik di tangah labuah, paruik ambo lapa bana, hauih nan tidak tatangguangkan.”
Mandanga kato Magek Manandin, baranti Rajo Kuaso, sanan bakato Rajo nantun, “Oi Buyuang Magek Manandin, lai tahu malah di lapa, kok hauih nan tidak dapek minum, tahan dek waang hantam tarajang.”
Diambiak batu tangah labuah, alah dilacuik Magek Manandin, manangih Magek Manandin, “Oi Mamak kanduang ambo, usahlah nasi nan ka dapek, hantam tarajang nan ditangguang, Mamak lacuik pulo jo batu.”
Bakato Rajo Kuaso, “Oi buyuang Magek Manandin, lai malah tahu di sakik, apo sabab mamaliang jawi, sajak dahulu den katokan, elok paralu pai mangaji, manyabuang juo nan waang sukokan, bamain dadu tiok hari, iko malah balasannyo.
Kini baitu malah dek waang, pado hiduik baiaklah mati, mambari malu dalam kampuang, tidak didanga tidak batanyo, di dalam kampuang Sandiangbaka, awak den manjadi Rajo, budak banyak sakarek koto, kabau bantiang ayam jo padi, tidak nan kurang suatu juo, salamo Buyuang gadang nangko, kinilah baru dapek malu.”
Manjawab Magek Manandin, “Kalau baitu kato Mamak, kok tidak buliah mintak ampun, barilah juo ambo ayia.”
Sadang dek Magek Manandin, usahlah ayia nan ka dapek, kanai lacuik sakali lai, alah mamakiak Magek Manandin, “Kalau baitu kato mamak, bunuah bana badan ambo, nak sanang hati mamak tingga, carilah padang nan agak tajam, nak tantu ambo manangguangkan.”
Biduak gajah pincalang banyak
Usah dikali anak Cino;
Biduak pacah pelang lah rarak
Kapa ditompang karam pulo
60
