- Luruih jalan ka Batusangka
- Babelok jalan ka Rambatan
- Di simpang jalan nan ka gaduang;
- Tidak guno ambo manyasa
- Lah tigo hari tidak makan
- Hantam tarajang nan ditangguang.
- Ditiuik api di puntuang
- Sakarek ka kayu bajo;
- Sajak ketek dimabuak untuang
- Gadang ditimpo dek sansaro.
Sadang dek Rajo Kuaso, sabuah tidak didangakan, alah diirik Magek Manandin, alah tingga darah di batu.
Dek lamo lambek di jalan, alah tibo di Sandiangbaka, tibo di rumah bundo kanduang, takajuik Puti Linduang Bulan, duo jo Datuak Bandaharo, diliek urang nan diirik, dipandang bana nyato-nyato, alah tarang Magek Manandin.
Mamakiak Puti Linduang Bulan, duo jo Datuak Bandaharo, takajuik pulo Puti nan Bungsu, alah turun ka tangah laman, bakato Puti Linduang Bulan, “Oi tuan kanduang Rajo Kuaso, apo bana kasalahannyo, sabab Si Magek Tuan bunuah, jikok sabab ameh jo perak, lai banyak ambo taruah, Tuan kanduang bapikia malah, anak ambo bairik sajo, tidak Tuan manaruah ibo.”
Manangih Puti Nan Bungsu, buah pantun baibo-ibo, “Tuan kanduang Magek Manandin,
Gadang korok pasa dahulu
Nampak nan dari ayia bangih;
Gadang harok ambo dahulu
Kini manjadi buah tangih.
Tuan kanduang Magek Manandin, barapo banyak utang Tuan, nak tantu ambo mambayia, Oi mamak denai Rajo Kuaso, tidak koh
mamak manaruah santun.”
62
