↓Laman ko alah sah
Urang bahimpun hanyo lai, alah diirik Magek Manandin, manangih Magek Manandin, “Oi mamak Rajo Kuaso, bari baa ambo ampun, tidak ibo mamak mambunuah, ikolah jinih badan ambo.”
Sadang dek bapak jo mandehnyo, alah tahu inyo jo badannyo, diliek anak alah bakabek, manangih manggaruang panjang, bakato Puti Linduang Bulan,
“Anak kanduang Magek Manandin, kok utang dapek denai bayia, salah tidak dapek ditimbang, dilawan tidak talawan, urang barajo di hatinyo, kini baitu malah dek anak:
- Kudo malompek batu balah
- Tibo di lurah pandakian;
- Usah diduo kahandak Allah
- Untuang lah sudah jo bagian.
- Sinaro Sutan Saidi
- Anak rang darek Banuhampu
- Barumah di ujuang tanjuang;
- Tidak guno anak sasa lai
- Suratan sudah dahulu
- Sajak di rahim bundo kanduang.”
Manjawab Magek Manandin, “Mandeh kanduang tingga malah di rumah, mandeh serahkan sajo pado Allah,
- Ambo saruangkan malah baju
- Karano dek baju ambo
- Disaruangkan lalu dihampaikan;
- Ambo tangguang malah dahulu
- Sabab dek laku ambo
- Badan ko juo marasaikan.
- Ambiak dek mandeh nan babuah
- Bialah pandan nan babungo;
- Ambiak dek mandeh nan batuah
- Bajalan ambo nan cilako.
66
