Ramilah balai Tujuah Koto
Parintah Lareh Pariaman;
Bajalan bujang nan cilako
Tingga jajak sapu halaman.
Rami pakannyo Kurai Taji
Nampak nan dari Ujuang Tanjuang;
Bajalan bujang di nagari
Mamintak doa urang kampuang.
Kamih balainyo Lubuak Basuang
Salasa di Pauah Kamba
Sinayan pasa nak rang Tiku
Hari Ahad ka Sungai Limau;
Bangih ruponyo mamak kanduang
Namuah mambunuah badan ambo
Malang Si Upiak Puti Bungsu
Ka mano ambo kan mahimbau.”
Alah sudah inyo bapantun, bakato Rajo Kuaso, “Mano dubalang nan barampek, sarato urang dalam kampuang, kito basigap hanyo lai, kito irik Magek Manandin, dicampakkan ka lurah dalam, kok gadang manyeso juo.”
Urang basigap hanyo lai, diambiak tali sahalai surang, alah diirik Magek Manandin, manangih Datuak Bandaharo, duo jo Puti Linduang Bulan, tigo jo Puti Nan Bungsu, maliek anak lah bairik,
buni tangih babuah-buah, “Anak kanduang Magek Manandin, tidak dapek kami manolong.”
Banduanglah ratok tangah rumah, manangih pulo Puti Bungsu, “Tuan kanduang Magek Manandin, kito baduo badunsanak, tidak nan lain diharokkan, ka mano ambo ka mangadu, jikok tidak dunsanak kanduang, ka sansai malah badan ambo, ikolah jinih panangguangan, iyo bana bak pantun urang,
Kampuang Jambak manyisia rimbo
Di baliak kampuang Mandahiliang;
68
