- Sadang mamak lai tak ibo
- Kununlah urang bakuliliang.”
Tidaklah kaba dipanjangkan, manangih Magek Manandin, urang banyak mairik juo, alah tingga darah di batu, bakato Magek Manandin, “Oi mamak Rajo Kuaso, hauih nan tidak tatangguangkan, raso ka putuih nyawo badan, barilah baa ambo ayia.”
Manjawab Rajo Kuaso, “Oi Buyuang Magek Manandin, hauih jo lapa nan takana, lai malah tahu di litak, anto namuah mamaliang jawi.”
Usah ayia nan ka dapek, jankan nasi nan ka buliah, diambiak tungkek dilacuikkan, alah dilacuik pulo Magek Manandin.
“Oi Buyuang Magek Manandin, ikolah ka ganti ayia, paubek lapa dangan hauih, sajak dahulu den katokan, tidak namuah masuak pangaja, kato urang tuo tidak didanga, bajudi juo waang sukokan, siang jo malam rintang badadu, bangso mulia jadi hino, sajak samulo den katokan, tidak waang latak dalam hati, badan ang juo manangguangkan!”
Manangih Magek Manandin, badan batambah latiah juo, bakato Magek Manandin, “Oi mamak Rajo Kuaso, Mamak sampaikan malah mambunuah, nak sanang hati Mamak tingga, tatapi sungguahpun baitu, kok jadi ambo mati, pacik pitaruah baiak-baiak, kalau dapek mamak mancarinyo, nan ka laki Subang Bagelang, iyolah nan mudo samo mudo, usah maharok kayo di urang, jan maharok di bangso tinggi, pandang anak pandang minantu, iyolah nan jolong samo jolong.
Sabab ambo mandapek kaba, mamak ka manjapuik Rajo Duobaleh, sabab itu urang nan kayo, lai rajo lai asa pulo.
Tapi sungguahpun baitu, pikiran ambo salah bana, harok di kayo urang sajo, tidak dicaliak roman anak, iyo bak buni pantun urang,
70
