Sawahlunto bapaga kawek
Bapaga sampai ka Durian;
Anak gadih balaki gaek
Harok dek murah pancarian.
Mamak kanduang bapikia malah, usah tangguang mangacak dunia, usah dihalang kapalangan, manjadi cacek kamudian, tidak diagak dipikiri, tangguang-tangguang buluah saruweh, samo namuah mangko manjadi.
Cubo hiduik bacacah jangek, rangkuah ka badan diri mamak, nak tahu di asin garam, nak tahu di padeh lado, usah elok di mamak surang, iyo bana bak pantun urang,
Diantak mangko dihantun
Didulang di lapaknyo;
Marasai mangkonyo santun
Kalau tidak digalakkannyo.
Ganjo di parak rang Subarang
Sarumpun jo duri lunak;
Elok di hati mamak surang
Tidak ditenggang hati anak.
Akhia kalaknyo kamudian, tandonyo tidak ka salamaik, arang habih basi binaso, urang mahambuih payah sajo, jariah banyak badaso tidak, Mamak juo manangguangkan, maklum pulang pado mamak.”
Baru mandanga kato nantun, bangih berang Rajo Kuaso, “Buyuang Magek Manandin, banyak bana kato waang lai, malah pandai baundang-undang, pandai bana bakato-kato, antoh namuah mamaliang jawi.
Mano dubalang nan barampek, hari basarang tinggi juo, kito bajalan hanyo lai.”
Diirik Magek Manandin, alah tibo di pintu rimbo, di tapi lurah nan dalam, manangih Magek Manandin, latiah nan tidak tatangguangkan, raso ka putuih nyawo di badan, kok dimintak bana
72
