Kaba baraliah hanyo lai, sungguah baraliah sanan juo, aliahnyo kapado Rajo Kuaso, alah bajalan Rajo Kuaso, dek lamo lambek bajalan, alah tibo di rumah baliau, alah naiak baliau ka ateh rumah, bakato Rajo Kuaso,
“Anak kanduang Puti Subang Bagelang, danga dek anak denai katokan, si Buyuang Magek Manandin, alah denai buang ka lurah dalam, sananglah hati denai kini, usahlah anak barusuah hati, kito cari nan ka gantinyo, ka pangganti Magek Manandin, urang nan rajo di nagari, nan tahu di paruik litak, kito baralek hanyo lai, kito pancang malah galanggang.”
Baru mandanga kato nantun, manangih Subang Bagelang, ayia mato badarai-darai, sanan bakato Subang Bagelang, “Daulat Bapak kanduang ambo, bari luruih ambo batanyo, tuan kanduang Magek Manandin, apo sabab Bapak buang, banakan malah pado ambo, kok nyampang mati tuan kanduang, ka sansai malah badan ambo.”
Manjawab Rajo Kuaso, “Anak kanduang Subang Bagelang, jikok itu anak tanyokan, kasalahan Magek Manandin, salah tak dapek dimaafkan, sabab manyabuang nangko juo, sampai kalah inyo bajudi, sampai tacemo mamaliang jawi, bangso nan mulia jadi hino.”
Baru mandanga kato nantun, alah manangih Subang Bagelang, sabuah tidak inyo manjawab, lalok sajo ka ateh anjuang, alah basah banta sabuah, tidua bagaluang di kulambu, makan tidak minum pun tidak, badan lah kuruih bagai pimpiang, habih hari babilang pakan, buni pantun babuah-buah.
- Anak rang darek barumah sudah
- Baukia janjang tanggonyo;
- Janji arek karang lah sudah
- Ka mungkia pulo moh kironyo.
- Parahu Si Marah Gelang
- Patah dititi kambiang hutan;
76
