Tigo tahun mandanga hilang
Tidak diganti jo nan bukan.
Anjuang di lawik Nago Sati
Sampan dikayuah nangkodohnyo;
Jauah nan tidak taturuti
Didangakan sajo baritonyo.
Kaba baraliah hanyo lai, baraliah kapado Rajo Kuaso, dihimpunkan urang nagari, bahimpun urang gadang ketek, diparentahkan di anak buah, dipabuek malah galangggang, galanggang pancari judu, ka judu Subang Bagelang.
Alah basiap urang nagari, dibuek malah galanggang, baukia bamego-mego, ukia sudah ragam tak jadi, jikok sudah maracun hati.
Alek bamuloi hanyo lai, alah sahari galanggang rami, darah ayam dibandakan, patah taji bak disukati, siriah manjadi sarok balai, gambia manjadi tanah liyek, pinang manjadi dama tondeh.
Alah banyak sutan nan datang, rajo pun banyak nan lah tibo, balun dapek nan ka judu, tidaklah kaba dipanjangkan. Kaba baraliah tantang itu, baraliah kapado Magek Manandin, sadang diam di dalam lurah, alah tahu inyo di bana, dicaliak kiri jo kanan, rimbo gadang baliak batimba, di suok di kida bukik, badan litak bukan kapalang, hauih nan tidak tatangguangkan, manangih Magek Manandin.
Hari nan sadang tangah hari
Sadanglah bunta bayang-bayang;
Siapo lawan ka bapari
Tatumbuak di badan surang.
Ladang urang banyak nan tampak
Parak mandeh ditanam padi;
Anak urang lah banyak tampak
Anak mandeh di mano kini.
78
