Si Burung Nuri
Kaba baraliah hanyo lai, sungguahpun baraliah sanan juo, aliahnyo kapado Puti Taruih Mato, anak Subarang Ayia Gilo, adiak dek Rajo Sunsang Baraik, kamanakan Sambah di Lawitan.
Kununlah Puti Taruih Mato, sadang duduak di ateh anjuang, alah diambiak Burung Nuri, bakato Puti Taruih Mato, “Adiak kanduang si Buruang Nuri, bajalan malah kini nangko, pai maliek dusun urang, kok lai taubek hati rusuah, badan ambo tidak manantu, hati nan samak-samak ibo, bamimpi ambo tiok malam, mimpi sudah ambo tagamang, hati ibo bacampua rusuah, bajalan Adiak kanduang kini-kini.”
Alah tabang si Buruang Nuri, tabang manyisia-nyisia awan, pueh malayang inyo malayok, banyaklah kampuang tajalani, banyaklah rimbo nan diliek, tigo hari lamonyo tabang, malayok inyo ka lurah dalam, bajalan hilia dangan mudiak, Allah Taala manggarakkan, tampaklah urang sadang bakabek, basanda di batang kayu, bakato si Buruang Nuri, “Oi Tuan urang nan bakabek, apo sabab karanonyo, sabab manangguang parasaian?”
Takajuik Magek Manandin, dicaliak hilia jo mudiak, tidak tampak urang di sanan, dipandang bana nyato nyato, iyolah tampak Buruang Nuri, bakato Magek Manandin, “Adiak kanduang si Buruang
84
