Nuri, ikolah jinih parasaian, tolonglah baa badan ambo, tolonglah bukak kabek nangko.”
Manjawab si Buruang Nuri, “Kalau baitu kato Tuan, suko ambo manolong, tapi ambo tidak batangan, namun tali ka ambo cotok, naknyo lapeh kabek nantun.”
Diangsua juo malah mancotok tali, habih hari baganti hari, tigo hari lamo di sanan, alah tabukak kabek nantun, sadang dek Buruang Nuri, dicaliak Magek Manandin, rancak nan bukan alangalang, laranglah puti ka judunyo, antah kok Puti Taruih Mato.
Bakato si Buruang Nuri, “Tuan kanduang dangakan malah, bari luruih ambo batanyo, di mano bana kampuang Tuan, banakan juo pado ambo.”
Manjawab Magek Manandin, “Kalau itu nan buruang tanyokan, namo ambo Magek Manandin, dusun nagari adiak tanyokan, kampuang ambo di Sandiangbaka, bapak ambo Datuak Bandaharo.
Tatkalo badan ka tabuang, ulah dek sabuang main judi, habih pakaian sapatagak, disangko lai ka manang, kironyo kalah nan basuo, cilako datang kamudian, mamak kanduang nan mambuangkan, bagala Rajo Kuaso, salah tak dapek mintak ampun.”
Mandanga kaba parasaian, manangih si Burung Nuri, alah bakato burung nantun, “Tuan kanduang Magek Manandin, Tuan tingga malah di siko, kok lai umua samo panjang, tajajak juo tanah tapi.”
Alah tabang si Buruang Nuri, alah tingga Magek Manandin, alah tibo di ateh lurah, hinggok inyo di kayu gadang, dicaliak hilia jo mudiak, tampaklah urang marambah ladang.
Bakato si Buruang Nuri, “Oi Angku urang baladang, tando urang mamancang rimbo, layokkan malah nasi kunyik, nak nyo salamaik buah padi, baitu pituah urang tuo-tuo.”
86
