tabueh digalanggang, mandjawab tabueh dimudie', mambaleh tabuah dihilie, sahui'-manjahui' tabueh nan banjak, tatjangang urang dalam kampuang, tasimbue darah didado, pulanglah urang dari dusun, sabab mandanga bunji tabueh.
Ado sasa at sakutiko, kiro-kiro pukue sambilan. alah datang sagalo ninie mama', sarato imam dangan kati', bilapun samo saratonjo, baie’pun urang patui'-patui', sagalo urang badjabatan, bahimpun kabalai gadang, dudue' baratue atêh balai, sirieh-manjirieh tampe' roko', tanjo batanjo samo kawan, apokoh garan panggielan 'ko.
Alah mandjawab nan surang laï: .,Djoko' itu datue' tanjokan, kurang parèso pado hambo, ato hanjo akan sabuah, tipa' didiri hambo surang, nan samalam-malam tadi, hambo mandanga urang tabalie, manjurueh rape' kabalai 'ko, tida' djadi bakatinggalan, itulah bunji tabalienjo, nan hambo danga malam tadi. Tambahan pagi tadi. tadanga pulo bunji tabueh, 'alamat manjuruek tjape' datang itulah sadjo hambo nan tahu, antahkoh ado kawan nan lain, nan lah maalum tantang itu; tjubolah pulo kito tanjokan, samantaro mananti-nanti kawan! Djoko' ado nan lah ma'alum, apo buah panggielan iko, buliehlah kito mamikiekan, ko' apo-apo nan kan tibo, ama' bulieh kito paiokan."
Dalam sabanta itu djuo, alah dilega sambah kiri, dilega pulo sambah kanan, batanjo datue' samo datue'. djoko' ado nan lah ma'alum, apo buah panggielan itu.
Ado sabanta antaronjo, sudahlah pulo tatanjoi, nan badakē nan barampieng. baie' kiri dangan kanan, sagalo datue' nan lah dudue', surangpun tida' nan laï tahu, dalam urang sabanja' itu; hanjo mupakat buah panggielan, itulah sadjo nan ma'alum, ulieh sagalo nan rapē' 'tu.
Ado satarie' sapatana', kiro-kiro pukue sapulueh, datanglah pulo pangatuonjo, iolah Datue' Kapalo, itulah urang nan mamanggie, marape'kan isi nagari 'tu. Sarato tibo injo dudue', basalam dangan karapatan, sambie batanjo dangan manih, kapado sidang karapatan:
..Alah lamo garan datue' tibo, pane'lah datue' de' mananti. de' talambe' hambo sadiki', ado pulo urang nan datang. mambao surê' dari gaduang, djurutulihpun lambe' tibo, bari ma'af hambo de' datue'."
Lalu mandjawab Karapatan: „Malah ba'itu panitahan, sananglah tu hati kami, djanjo kami kami nan lambe', sabah hari lah aga' tinggi, tabuehlah babunji djuo, takui' batjampue djan rusueh. alah tagului' kami badjalan, kironjo datue' kudian pulo. Ko' hanjo tantangan itu, itulah pakai nan biaso, nan tjape' tibo dahulu, nan lambe' tibo kudian. Limbago urang gadang-gadang, bukan sabuah karadjonjo, ma'alum kami tantang itu."
