BAB VI
KAMATIAN DATUE' RADJO PANGULU DAN
PANGANGKATAN BAGINDO KAJO DJADI
PANGULU
KABA baralieh anjolaï, sunggueh baralieh sanan djuo, sa danglah Bagindo Kajo, de' sangat radjin hatinjo, tida' baranti injo datang, tio' hari berulang djuo, io kapado ma ma'njo 'tu, mananjokan sapandjang ‘adat, mangadji tambo radjo-radjo, baie pun undang nan salapan, sarato undang nan duo baléh undang nagari undang luha', mangadji salah dangan sili', dapë'lah itu kasamonjo, kati-mangati barē' ringan, timbang-manimbang luruih bana, itupun sudah dikatahuinjo.
Lamolah pulo antaronjo, adolah garan satu tahun, saki' Datue Radjo Pangulu, sabidjo nasi ta' tamakan, aie diminum ta' tarague. djarieh batjampue dangan batue', ditiduekan tida' sanang, dibao dudue' tambah labieh, namonjo saki' urang tuo, batimbun ube' dangan tawa siang malam tida' baranti, barapo banja' urang manjilau, mambaokan ubė' samonjo, usahkan sambueh tambah garang.
Malië rupo damikian, susahlah Bagindo Kajo, mantjari urang pandai ube', mantjari urang pandai tawa, paï batanuang sano sini, dimano sadjo kadangaran, urang nan pandai-pandai ube', didjalangnjo itu samonjo, apo ube' dibari urang, dilakē'kan balako kamama'njo, satupun tida' manolongi, djangankan itu mangurangkan, hanjo batambah labieh djuo. Sampailah pulo tudjueh hari, patang Kamih malam Djuma'at, kiro-kiro pukue salapan, urang sudah sambalijang 'isa, pangsan Datue' Radjo Pangulu, tida' tahu di diri laï, dihimbau tida' injo babuni, alah bakumueh atēh lapie', napèh kalua satu-satu, bakarueh-karueh didadonjo, dingin badannjo pantun aie, lamah tulangnjo ba' kaladi.
Sadanglah Bagindo Kajo, malië' mama'njo nan ba'itu, alah sasa' sadjo pikicrannjo, urang lah habih manangih, nan bagole' lah bagolé, nan marato' lah marato', tida' dape' ditagah laï, nan sakaum-kaum itu: dalam sabanta itu djuo, datang pikieran Bagindo Kajo, balari sadjo injo turun, badjalan bayagēh-gagēh, mandjapui Tuanku Malim Kunieng. guru Datue' Radjo Pangulu. Ado sabanta antaronjo, sampailah injo kasurau 'tu, surau Tuanku Malim Kunieng, dilurah Pantjueran Tinggi.
