115
Mangko baio-iolah Datue' Paduko 'Alam, dangan datue' dalam Patapang Nan Tigo Balai, akan manarimo panjambakan kapan itu. Alah injo samupakat, mangko disuruehlah pulo saurang manti, ulieh Datue Patapang Nan Tigo Balai, mandjawab sambah itu, lalu taga' pulo mantinjo itu, dangan manjambah damikian :
,,Maminta ampunlah sajo, bakeh karapatan datue' djo tuanku, Sarato partiapan tuan manti pagawai, dangan tuan urang kajo-kajo, sado nan halie saisi rumah nan gadang 'ko; tida' akan tahato' akan tabilang, sambah sajo mandjalani datue' sado nan halie, sajo rapa' panjambahan katangah, sungguhpun ditangah, di tuan pagawai tibo sambah."
Mandjawab manti nan manjambah mulo tadi:,,Kapado Tuhan kito, manitahlah tuan."
Maulang manti nan surang: „Apolah nan kan sajo sambahkan, nan ba' pitua tuan tadi, usah kato akan diulang-ulang:
Talang di Tandjuang Baralua',
diambie' ka djundjuang sirieh.
De' malang tida' tatula',
mudjue nan tida' taraieh.
Adapun datue' 'ko lah singke' 'umue lah pandjang langkah, alah kadatangan hukum Allah, alah tadahulu dari pado datue'-datue' nagari nan tigo.
Nan baïtjo nan bapakai, de' datue' dalam nagari, mati bapa' manga- pan ana', mati ana' mangapan bapa': sakarang alah tadahulu ana' dari bakonjo, sadjo iolah kapan nan salampih dari bako, utjapan datue' dalam Piliang Nan Tudjueh Djurai, ka dipalalu ka datue' dalam Patapang Nan Tigo Balai, ba'itu panitahan."
„Sabananjo," djawab manti piha' bako.
Maulang manti si pangkalan: „Inda' laï, utjapan datue' dalam Patapang Nan Tigo Balai, kasieh ditarimo titah didjudjuang."
,,Alhamdulillah," djawab manti piha' bako. Alah salasai sambah manjambah itu, mangko kapan itu ditatieng anjolaï, ulieh manti piha' bako, sarato dangan dulang-dulangnjo, diantakan kahadapan datue'- datue', dalam Patapang Nan Tigo Balai. Ulieh datue-datue' Nan Tigo Balai, diambie' kapan itu dari bungkusannjo dalama' tadi. Mangko du- lang sarato dalama' bungkuihnjo 'tu, diantalah pulo kumbali katangah, ulieh manti si pangkalan, kamuko ninie' mama' piha' bako 'tu. Damikian itulah pulo, urang manjambahkan kapan, nan datang dari ana'-ana' datue' nan mati 'tu, sarato kapan dari istirinjo, dan manarimonjopun ba'itu djuo, dangan sambah-manjambah djuo, saparati tasabui' diateh tadi, ba'itu 'adat nan sudah biaso, io dalam nagari itu.
