118
bahjang. Sudah salasai dari mandi, lalu dikapan anjolaï, dilata' atēh usuangan, masue' kadalam katjang pali. Alah salamat itu samonjo, mai' diara' anjolaï, hado' kapandam pakubuerannjo, diara' basamo-samo, ulieh sagalo urang sia', dangan rati' zikiru'llah. Samantaro sapandjang djalan, basēra pitih kiri kanan, disera'kan ulieh bakonjo, dudue' badjuntai diusuangan, bapajuangi dangan pajuang gadang, banamo pajuang ubue-ubue, Alah sampai dipandam pakubueran, usuangan dilata'kan baie'-baie, mai' dikaluakan anjolaï, dari dalam usuangannjo; sudah itu disambahjangkan, ulieh sagalo sia-sia'; salasai pulo sambahjang, lalu ditanam baie'-baie', didindieng pulo dangan papan, baru disungkui' rato-rato sudah disungkui' rato-rato, diapuang pulo tanah badan, ditaga'kan pantjang duo buah, sabuah tantang kapalonjo, sabuah tantang kakinjo; sudah itu ditalakinkan, diatēh tanah badan tadi, dibatjokan do'a talakin. dikambangkan pulo unduang-unduang; salasai dari pado itu, barulah pulang urang samonjo.
Adapun datue' dalam nagari, nan datang mandjangue' tadi, alah mupakat tangah rumah, lalu diadjun panjambahan, dari udjuang lalu kapangka, dari tangah lalu katapi, ditjari kato kabulatan, handa' maminta ganti dansana', karano sudah sampai hukumnjo, minta' diganti djo nan mudo, itu mupakat datue' nagari. Alah samupakat kasamonjo, ditanam pulo satu datue', nan akan djadi udjuang lidah kapalo sambah manjampaikan kapado si pangkalan; dapē'lah pulo kabulatan, bawakie kapado surang datue', bagala Datue' Paduko Intan, pangulu didalam suku Piliang, itu nan akan manjambahkan, parmintaan datue' nagari, kapado datue' si pangkalan.
Adapun Datue' Paduko Intan, urang tjadie' tjandokio, manih mului' bakato-kato, biaso djadi atjang-atjang, dimano-mano karapatan, lalu manjambah maso itu, damikian buni sambahnjo:
..Maminta ampunlah sajo, bakěh karapatan datue' djo tuanku, sarato partiapan tuan manti pagawai, dangan tuan urang kajo-kajo, sado nan halie saisi rumah gadang 'ko; tida' akan tahato' akan tabilang sambah sajo mandjalani sidang karapatan datue'; sajo rapa' panjambahan katangah, sungguhpun ditangah, di Datue' Paduko 'Alam tibo sambah."
,,Kapado Allah, manitahlah datue'," djawab Datue' Paduko 'Alam. Maulang Datue Paduko Intan: „Apolah nan akan sajo sambahkan. karano de' malang nan tida' tatula', mudjue nan tida' taraieh, adapun akan datue' 'ko, lah singkē' umue lah pandjang langkah, lah tadahulu dari datue'-datue', dalam nagari nan tigo 'ko.
