122
parampuannjo, mangatokan Bagindo Kajo ka djadi pangulu, manggantikan datue' nan mati.
Mandanga kato ba'itu, ninie' mama' sabalah bakonjo, sarato ninie' mama parampuannjo, lalu madjawab maso itu: „,Malah ba'itu kabulatan, manarimo suko sadjo kami, alhamdulillah itu di kami."
Adapun Datue' Paduko Alam, dangan datue' nan lain-lain, sagalo datue' dalam Patapang Tigo Balai, lalu babalie' karumah gadang, mandape'kan datue' nagari, dudue' ditantang pintu gabang, mangadap karuang tangah; alah sudah dudue' samonjo, lalu menjambah anjolai. io Datue' Paduko 'Alam, kapado datue' nagari, ba'itu buni sambahnjo
Ampun basalah sajo de' datue', sado nan halie saisi rumah nan gadang 'ko, sarato partiapan tuan manti pagawai, dangan tuan urang kajo-kajo, sajo mandatangkan sambah, tida' akan tahato' akan tabilang. sambah sajo mandjalani ka haribaan sagalo datue' sado nan halie, sajo rapa' panjambahan katangah, sungguhpun ditangah, di Datue' Paduko Intan djuo tampe' tibo sambah."
,,Kapado Allah, manitahlah datue'," djawab Datue' Paduko Intan. Maulang Datue' Paduko 'Alam: „ Apolah nan akan sajo sambahkan? Adapun nan parmintaan datue' nagari tadi, kapado kami datue'-datue' dalam Patapang Nan Tigo Balai, karano datue' nagari lah kahilangan surang dansana', nan baïtjo nan bapakai, de' datue' dalam nagari, ko mati gadjah tingga gadiengnjo, mati harimau tingga balangnjo, mati datue' basilieh djo datue': kini karano datue' nan tuo, lah tadahulu dari kito, sakarang handa' siliehnjo datue' nagari; ba'itu parmintaan datue' nagari tadi, kapado kami datue' dalam Patapang Nan Tigo Balai.
..Sabananjo," dawab Datue' Paduko Intan.
Maulang Datue Paduko 'Alam: „Inda' lai, de' kami sagalo datue' datue' dalam Patapang Nan Tigo Balai, ko' digajui'i batu de' datue nagari, iolah akan tanggalam kami, ko' digajui'i sabui' iolah akan tarapuang kami kini kami lah dibabani ulieh datue' nagari, supajo diganti datue' nan hilang 'ko, de' kami datue'-datue' dalam Patapang Nan TigoBalai.
Itupun alah kami paiokan pulo, tantangan parmintaan datue' nagari itu barakat kabasaran datue' nagari, lai tahimbau di namonjo, laï taturui' di djalannjo, alah sakato kami disanan, sagalo datue' dalam Patapang, sarato korong dangan kampuang, akan manjilieh datue' nan hilang 'ko.
Alah saudjui' sapangana kami dangan datue' nagari tantangan itu.
Sungguehpun itu damikian, karano pitua urang tuo, putuih kato dipangkanjo, sudah gajuang dibalaběh, kini sabuah laï pinta' kami
