132
kaharibaan datue' sado nan halie, sajo rapa' panjambahan katangah, sungguhpun ditangah, dituan Bagindo Radjo tampe' sambah tibo."
,,Kapado Allah, manitahlah tuan," djawab Bagindo Radjo.
Maulang Radjo Nan Mudo: „Apolah nan akan sajo sambahkan, nan ba' pitua tuan pagawai tadi;
Karano haripun lah baie'. kutikopun lah ĕlo', tipa' di 'adat djo sidakah, nan baïtjo nan bapakai, de' datue' dalam nagari, tipa' di nan sarupo iko, iolah adat kapado sagalo datue', sidakah kapado sagalo tuanku.
Kini tantangan nan sapandjang ‘adat, utjapan datue' dalam Patapang Nan Tigo Balai, alah akan dipalalu, kapado datue'-datue' nagari, dimano-mano tampe' tibonjo. ba'itu panjambahan tuan."
,,Sabananjo," djawab Bagindo Radjo.
Maulang Radjo Nan Mudo: „Inda' lai de' datue' nagari sado nan halie, lah putjue' ditjinto ulam tibo, kasieh ditarimo, titah didju-djuang sadjo."
Alhamdulillah, itulah nan kahanda' hati," djawab Bagindo Radjo,
Sudah batarimo sambah itu, mangko datue'-datue' dalam Patapang Nan Tigo Balaipun maisilah duo tigo buah tjarano batirai, dangan uang nan akan paisi 'adat itu, sabagaimano nan sudah dibiasokan.
Alah sudah tjarano diisi, lalu disurueh pulo duo tigo urang manti, mandjalankan adat itu, kapado sagalo datue' nan halie, sarato kapado sagalo urang patui'-patui' samonjo. Mangko manti itu dangan haromat- njo, sarato basërong dangan sapatui'njo. mambarikan ‘adat-'adat itu kapado sagalo datue'-datue' nan rape', dan urang-urang patui'-patui" kasamonjo. Alah sudah adat diisi, limbago sudah dituang, kapado sagalo datue'-datue' dan urang patui'-patui' itu, mangko disuruehlah pulo taga' saurang manti, ulieh datue' dalam Patapang Nan Tigo Balai, akan manarangi ‘adat-'adat itu, kapado sidang karapatan datue'-datue' nagari. Mangko badirilah pulo saurang mantinjo maso itu, bagala Bagindo Sati, lalu manjambah damikian buninjo:
,,Maminta ampunlah sajo, kapado karapatan datue' sado nan halie, nan saisi-isi rumah nan gadang 'ko, sarato partiapan tuan manti pagawai. dangan tuan urang kajo-kajo, sajo manjambah tida' akan tahato' akan tabilang, sambah sajo mandjalani kaharibaan datue' sado nan halie.
Apolah nan akan sajo sambahkan, karano nan badjalan ana' buah datue mudo matah, tipa' di 'adat nan didjalankan, ko' talampau ko' talampo', sadjo iolah ama' batanjoan datue' nan badake'-dake' dudue' tio'-tio' ruang tio'-tio' saho'. Ko' umpang bulieh disisi', ko' tingga bulieh didjapui'. sambah sajopun naie', titah datue' djuo sajo puhunkan."
