135
Sungguehpun itu damikian, sabuah laï parmintaan, dari datue' nan Tigo Balai, kapado datue' sado nan halie.
Karano datue' nan baru 'ko, de' 'adat dalam nagari, baliaulah tapaui batali, tatambang balanta' namonjo, djoko' untuang pambari Allah, diminta' djuo ka nan rape', ama'lah dilie'-lie', diulang-ulang djuo, baliau datue' nan baru, mandjalang tali diputuih lanta' ditjabui', sakian sadjo sambah sajo."
Mambaleh Parmato Intan: „Mano tuan Bagindo Sati, djoko' itu nan panitahan, alhamdulillah akan djawabnjo, kasieh itu kami tarimo, na'imat suko salamonjo."
Alah sudah sambah-manjambah, barulah sagalo sidang karapatan, bagara dari tampe' dudue'njo masieng-masieng, badiri akan pulang ka- rumahnjo, sarato basalam-salaman pulo, dangan datue' nan baru, dan datue'-datue' Patapang Nan Tigo Balai, barulah injo badjalan turun.
Sadang ukatu datue'-datue' isi nagari itu turun kahalaman, mangko katjang pali nan disaho' pasumandan tadi, diara' uranglah hado' kapandam pakubueran datue' nan mati tadi.
Didalam kutiko itu banduanglah buni rato' sagalo kari' baï' korong kampuang datue' nan mati itu, sangat manjadiehkan hati mandanganjo, sakan-akan malapēh datue' nan mati itu kapandam pakubueran rasonjo.
Dalam kutiko itu djuo, bako dan ana' istiri datue' nan mati 'tu, pulanglah karumahnjo masieng-masieng, sarato korong kampuangnjo nan mahanta paï mandjangue'pun samo pulolah sakali. Bako dan ana' istiri datue nan mati itu, dianta pulo dangan saparati patui' barami-rami, ulieh parampuan-parampuan dalam kampuang dan suku datue' nan mati 'tu, sampai karumah tanggonjo, saakan-akan pamudjue' hatinjo nan karam 'tu.
Sampai dirumah bako dan ana' istirinjo 'tu. urang-urang nan mahanta tadi, dinanti pulo ulich urang dikampuang 'tu dangan saparati patui, sarato disadiokan pulo minum makannjo sakali, pananti urang mahanta bako dan istiri namonjo. Alah sudah minum makan, urang nan mahanta bako dan ana' istirinjo itu, barulah injo pulang kumbali karumahnjo masieng-masieng, karano ba'itulah 'adat nan sudah dibiasokan disitu.
Sapaningga datue' nagari tadi turun, barulah datue' nan baru 'tu, mangganti pakaiannjo dangan biaso, sarato mamakai dēta bakata', pakaian pangulu sapandjang ‘adat.
Mulaï dari hari itu, tinggalah datue' nan baru 'tu, dirumah sudaro- njo, dangan sagalo kaum kirabatnjo, sarato urang dalam sukunjo, baie' laki-laki atau parampuan, ado djuo nan tingga marami-ramii disitu ;
