160
tjarano batirai, kahadapan sidang karapatan datue' nagari, ditatieng ulieh saurang mantinjo, dangan pakaian saparati patui', sarato basimpueh mala'ta kan uang 'tu, dihadapan datue' kaampe' suku. Alah sudah tjarano itu talata', mangko bamupakatlah datue'-datue' nagari ditangah rumah itu, tantangan manarimo sakalian baieran, utang datue' nan baru itu. Alah sabanta antaranjo, datue'-datue' itu barundieng, sambah-manjambah datue' ditangah, bagaimano manarimo baieran utang datue' nan baru itu; sakiro-kiro damikian buni parundiengan, datue' nan ditangah 'tu:
Mano datue' nan diudjuang nan dipangka, nan ditangah nan ditapi, sarape'njolah datue' kaampē' suku, nan saisi-isi rumah nan gadang "ko," sambah Datue Lēlo Maharadjo. ,,Karano baliau datue'-datue' Patapang Nan Tigo Balai, alah malata'kan baieran utang datue' nan baru, kaharibaan datue' sado na halie, alahkoh akan djadi kito tarimo, ama'ah sadjawab kito nan basamo?"
Mandjawab datue' nagari kiri dangan kanan: „Mano Datue' Lēlo Maharadjo! Karano alah itu nan panjambahan datue' Nan Tigo Balai, kapado datue' nagari, alah sapatui'njo bana datue' nagari manarimo baieran 'tu, supajo ama' bakalapēhan antaro kito, dangan baliau tantangan itu, karano sapandjang pitua datue' djuo, lapeh utang de' babaie, lapeh kabe' de' baungkai; kini karano baliau handa' lapēh dari pado utang baliau 'tu, alah baliau undjue'kan kapado kito apo-apo nan akan pambaienjo; alah wadjib pulo di kito manarimonjo itu, supajo ama' samo-samo bakasanangan, antaro kito kaduo balah piha' dangan baliau. Atonjo akan sabuah, nan ba' pitua datue' djuo, sudaḥ gajuang dibalabēh. sudah kato dipangkanjo; ba'apo kini laï, nan kabulatan kami nan basamo tantangan akan manarimonjo 'tu, iolah mangumbali djuo kami ka datue'.'
Maningkah Datue' Lēlo Maharadjo, sambie manjambah damikian „Maminta ampunlah djuo sajo, diharibaan datue' kaampē' suku sado nan halie, tantangan akan manarimo 'tu; maminta'lah sajo kapado datue' sado nan halie, karano hambo 'ko kurang pandape' tantang itu, ama'la datue nan lain pulolah manarimo 'tu, dari datue' Nan Tigo Balai : sakian sambah sajo kapado datue' sado nan halie."
Maningkah datue' nagari :,,Mano Datue' Lēlo Maharadjo! Didatue tibo sambah kami."
Kapada Tuhan kito," djawab Datue' Lelo Maharadjo.
Maulang datue' kaampe' suku: „Tantangan manarimo itu, usahlah duo tangan pulo kito laï, malainkan sagalo kami datue' kaampē' suku sado nan halie, alah bule' sagole', pipih salajang kami nan basamo, malainkan datue' djuo nan akan manarimonjo 'tu, dari pado datue' Nan Tigo Balai."
