179
Adapun nasi kunieng itu, bukannjo sabuah sadjo; dimano rumah parampuannjo, parampuan datue' nan baru, mambue' pulo sabuah surang; djadi balomban pulo disanan, ganti labieh-malabiehi, iolah bungo djan ukienjo.
Tasabui dirumah si pangkalan, alah bamulo urang datang, lalu mu- pakat anjolai, io datue' Nan Tigo Balai, manjurueh urang paï mandjapui"," mandjapuí' nasi kunieng tadi, karumah bako djan bininjo; itulah djapui'sapandjang adat, mandjapui' bako djan bininjo, ba'itu bapakai nan biaso.
Urang paï mandjapui' itu, langko' djan alat kabasaran, mamakai pajuang djan marawa; sarato ninie' dangan mama', langko' djan manti pagawainjo, sarato urang mudo-mudo, ana" urang nan patui'-patui'. laki-laki parampuan, mamakai pakaian ‘adat, langko' djan dajang-da- jangnjo, sampai sapulueh duo puluch, urang nan paï mandjapui' 'tu, hado' karumah bakonjo; itulah awa pandjaputan.
Alah badjalan urang itu, paï pulo satoboh laï, hado' karumah parampuannjo; ba'itu djuo atuerannjo, baie' nan mudo atau nan tuo, didjapui' balako itu samonjo.
Alah tibo urang nan mandjapuí', dirumah bakonjo tadi, dibari urang minum makan. diatēh dulang batirai.
Alah salasai minum makan, disambahkan anjolaï de' datue' nan datang tadi,Mukasui sangadjo dalam hati, iolah mandjapuí' nasi padaunan, sarato bako datue' nan baru, ama' sairieng itu sakali, dangan sagalo ninie mama', sarato urang patui'-patui', laki-laki parampuan, sado nan halie disiko, ama' sarangkē' itu sakali; sakian sambahi pado datue'."
Tida'lah itu dipandjangkan, alah sudah sambah-manjambah, lalu mamakai anjolaï, bakamēh balako samonjo, mano-mano urang nan kan paï.
Diatēh rumah parampuannjo, ba'itu pulo itu hado'njo; alah sudah sambah-manjambah, mamakai pulo parampuannjo, io parampuan datue' nan baru: mamakai sapandjang ‘adat, sabab injo akan diara', basamo dangan datue' nan baru. Dipakainjo kain sakalat, io sakalat 'aina'lbanat, dipatingkahkan tjindai suto, ike' pinggang ameh bakarang, banamo patah sambilan, dipagatang badju suto, dipakai salēndang adjuang sare', dikana'kan pulo galang bahēram. buatan Siano' Koto Gadang, sautêh djan polam biru mansi, panuehlah djari kiri kanan, intan djo podi mato tjintjin, takana' tjanggai dikalingkieng; dipakai pulo bungo sanggue, aneh batatah ukie tjino. babungo baranggai-anggai, dipakai suntieng ditalingo, diganggam pulo sapu tangan, banamo bungkusan sirieh, suto Patani budjue sangka, tio' sudui' pakai kabamban. basalui' djo bungo kuni', amêh djo urai samonjo, buatan Panta Paueh Tinggi.
