15
tjintjin, tibo ukatu kamatian, sabagaimano adat lamo. Kalau tumbueh kamatian, dirumah kari' djo kabiehnjo, atau dirumah pasumandannjo, barang siapo padusi nan kan paï mandjaugue', mambao barêh sadjo tu mah laï; kalau injo bapasumandan kari', mambao bareh injo sagantang, kalau nan tida' hampie bana, mambao barêh injo tangah sukē', kalau nan urang luaran sadjo, mambao bareh injo satjupa'.
Nan katigo, barang siapo laki-laki, nan mandjadi marapulai, tida' akan bali-mambalikan kari' djo baï'njo, djo ana'-ana' pantjanjo laï, nan sahinggo iko kaatēh, malainkan kalau urang nan djadi marapulai 'tu pangulu atau nan masue' bahagian urang nan ampe' djinih, mambari balandjo sadjo injo tigo rupiah, pado ukatu hari pakan nan paratamo, injo pulang karumahnjo 'tu, dan pado pakan nan kaduo, mambari balandjo sadjo injo saringgi'. Kalau marapulai 'tu urang patui'-patui', tanamo ana' bangsawan, pakan nan paratamo pulang karumahnjo, mambari balandjo sadjo injo saringgi', pakan nan kaduo tangah duo rupiah. Kalau bangso urang kabanjakan sadjo, nan djadi marapulai 'tu, mambari balandjo injo duo rupiah, pakan nan kaduo satu rupiah. Dan nan parampuan, misiki parampuan siapopun djuo, tida' bulieh lagi awa'njo, maagieh-agieh pambalian tadi, sapandjang 'adat nan biaso, dalam nan duo pakan itu, akan djadi tando bali lakinjo, malainkan kalau apo-apo nan dibalinjo dalam pakan nan duo 'tu, iolah untue' awa'njo sadjo.
Siapo-siapo urang laki-laki, atau parampuan nan dalam nagari nan malangga pabuatan 'ko, awa'njo akan disalahkan sapandjang 'adat, dago-dagi namo salahnjo, iolah disalahkan mandago kapado pangulu, sabab tida' manurui' mupakat pangulu-pangulu, tantangan djalan kabaikan pado nagari. Barang siapo nan malangga itu, tida' amueh mamakai hukuman salah dago-dagi 'tu, awa'njo dikaluakan dari sapandjang adat nagari, ko' saki' tida' disilau, ko' mati tida' didjangue', dan tida' dibao saara' saireng saale' sadjamu, dan salarangan sapantangan laï; kalau apo-apo panggelannjo, tida akan ditamui, kalau injo balun mambaie kasalahan. sapandjang 'adat nan dihukumkan, ulieh pangulu-pangulu. sabab malangga mupakat 'tu. Damikianlah kasudahan bunji mupakat 'tu, nan sakali-kali tida' akan ubah-maubahi salamo-lamonjo, turun-temurun sampai kapado ana' tjutju nan kamudian.
