BAB II
DATUE' RADJO PANGULU MAMBARI PANGADJARAN KAPADO KAMANAKAN BALIAU
KABA baralieh anjolaï, sunggueh baralieh sanan djuo. Adapun didalam nagari 'tu, adolah pulo datue' surang, bagala Datue' Radjo Pangulu. urang tjadie' tjandokio, lagi djohari bidja'sano, manih mului' bakato-kato. dimalui urang nan banja', aka laui'tan budi, tahu dikarang nan malintang, tahu diangin nan basalue', pandai dihērēng dangan gendêng, tahu diakie pakadjoan, tahu dibajang kato sampai, manih mului' katudju baso, pandai manēnggang hati urang, luruih nan bukan alang-alang. bana ta' bulieh angin lalu, salah sadiki' de' lah tuo, badannjo tida' kue' laï, akan badjalan sano sini, atau mandjalang karapatan, dimano urang bamupakat, nan didalam nagari 'tu.
Djoko' ado karadjo burue', ataupun itu karadjo baie', apo-apo dibuĕ' urang, nan didalam nagari 'tu, baliau lah mamulangkan sadjo, kapado kamanakan kanduang baliau, banamo Sutan Kabilangan, bagala Bagindo Kajo, itulah nan djadi wakie baliau, mandjalankan sapandjang 'adat. misiki barē' atau ringan, pulang kapado Bagindo Kajo, salamo datue 'tu sudah tuo, sabab tida' kuaso laï, hanjolah tingga disurau sadjo, mangadji-ngadji nan ka untue' badan diri, ka baka dibao pulang.
Namun samaso laï mudonjo, tantangan Datue' Radjo Pangulu, baliau mandjadi atjang-atjang, djadi wakie de' urang banja', uleh mului' sambuangan lidah, dimano-mano karapatan, baliau djadi kapalo sambah, ikutan sagalo datue'-datue'. Namun dimano karadjo basa, nan tumbueh dalam nagari 'tu, kalau baliau tida' ado, banja'lah sambah nan tatumbue'. banja'lah kato tabangkalai, ba' itulah banja' kadjadian salamo baliau sudah tuo, tida' basuo itu laï.
Tasabui pulo kato nan tadi. Adapun didalam nagari 'tu, uranglah sudah bamupakat, mantjari djalan karinganan, mampaténggangkan ana' buah, supajo baban bulieh ringan, ama' badiri kamadjuan, diubah adat nagari.
Pado maso kutiko itu, adolah Bagindo Kajo, paï pulo injo kasanan, iolah kadalam balai gadang, mahadieri mupakat itu, ganti Datue' Radjo Pangulu, djadi wakie mutala'njo, Alah sudah urang mupakat, pulanglah
