204
Mandanga kaba nan ba‘itu, mandjawab datue’ nagari: „Malah ba’itu kato datue’, sananglah itu hati kami, mananti malah kami dahulu, dari datue’ Nan Tigo Balai,”
Alah sudah rundieng itu, ‘adat diisi anjolai, ulieh datue’ Nan Tigo Balai, ‘adat kapado datue’ nagari, ‘adat kapado urang mandjangue’. Alah sudah ‘adat diisi, sudahlah pulo ditarangi, ko’ talampau ko’ talompe’, maminta’ idjin anjolai, sagalo datue’ nan mandjangue’,, handa’ kumbali anjolai, pulang katampé’ masieng-masieng. Dé’ datue’ Nan Tigo Balai, alah dibari pulo idjin, pulanglah urang samonjo, katampé'njo surang-surang, bahati ibo samonjo, manganakan Datue’ Radjo Pangulu.
Kunun dé datue’ Nan Tigo Balai, lah didjago kampuang itu: sampailah pulo tigo hari, barulah tahu surang-surang, alah ingé’ akan dirinjo; hanjolah si Bungo Inai, baduo dangan antjunjo, talalu pasie’ sakali, adang-adang injo tagala’, adang-adang injo manangih, tida’ tahu di minum makan, tida’ paduli apo-apo, abue’ kusui’ kutulah banja’, daki taba kain lah busue’; kalau nasi dibari urang, dimakannjo sadang banjanji, kadang-kadang sadang manangih, kadang-kadang dibuangkannjo. Sampailah pulo tigo bulan, banja‘lah pulo dukun maubati, alah barubahk itu sadiki’, alah tahu pado dirinjo, tatapi bamanuang-manuang djuo. kadang-kadang injo marato’, kadang-kadang injo gala'-gala’ surang. tumbueh saula’-saula’, disalap sétan djo ibilih, Antah barapo garan lamonjo, barulah baie’ kaduonjo, baie’ sabagai samulo.
TAMMAT.
