17
urang kasamonjo, katampe'njo masieng-masieng. Tasabui' Bagindo Kajo, babalie'njo dari sanan, païlah injo kamama'njo, ka Datue' Radjo Pangulu. disurau Batu nan Gadang. Lamo sabanta injo didjalan, sampailah injo kasurau 'tu; alah lalu naie' sakali, didapati diateh surau, tida'lah ado urang lain, banjo datue' 'tu surang sadjo.
Alah sabanta injo tibo, bakato Bagindo Kajo, mangadap pado mama'njo, lalu bakaba anjolaï, mangabakan mupakat tadi, lalu disabui' samonjo. dari awa sampai kaakie, apo buah mupakat 'tu, satupun tida' katinggalan. baie' hukuman nan dibuē', kalau ado urang malangga, nan sapandjang mupakat 'tu. Mandanga tjurito Bagindo Kajo, tantangan mupakat 'tu, tamanuanglah Datue' Radjo Pangulu, sapatah tida' injo manjahui', malainkan baliau manakue sadjo, sambie manggēlēng-gēlčng katjie”. ‘alamat ado nan baliau pikiekan.
Alah salasai Bagindo Kajo, mantjuritokan buah mupakat 'tu. batanjolah injo kapado mama'njo, iolah Datue' Radjo Pangulu:
,,Ba' apokoh itu pikieran datue', nan sapandjang mupakat kami, laikoh elo' nan ba' itu, atau adokoh itu salahnjo? Ko' pandjang ama' datue' kare', ko' barubah datue' baiki, ba' ato datue' ano-ano' sadjo."
Mandanga tanjo Bagindo Kajo, mandjawab Datue' Radjo Pangulu. sambie mangalueh maharang pandjang: Hai bujuang, ko' hanjo tantang buatan urang 'tu, ko' pandjang tida' akan takare, singke' tida' akan tahubuang 'tu de' hambo, karano rundieng alah habih, kato alah sudah.
Ba' ato kini nan pitaruah hambo kapado ang, nan sahinggo iko kaatéh. himat-himatlah babitjaro, sabab ang alah gadang. Lah tjadie' pandai pulo djanjo urang, alah dibao urang sahilie samudie' sadudue' sataga', alah ka tuo pulo ba' rupo hambo 'ko laï, ko' mati awa' hambo. awa'anglah nan kan manggantikan hambo djadi pangulu.
Ko' sampai ang djadi pangulu, kalau apo-apo nan ka dibué', pikieri banalah dahulu, timbang mularat djo mupa'atnjo, apo-apo rundiengan usahlah sahimbau sampai, salangkah tibo sadjo; bara ko' êlo' bana tampa' de' mato, atau taraso de' hati, tapi antah ado pulo burue'njo. karano tio'-tio' nan elo' 'tu, ado pulo nan burue' didalamnjo, dan tio' tio' nan burue' 'tu, usah pulo dibuang sadjo; kadang-kadang banja' djuo elo'njo. Kabanjakan pulo nan ba' itu, sabab kato-kato pangulu 'tu, satitie' kadjadi laut, sakapa ka djadi gunuang, ka dipakai dé' urang banja', ka didjawe' turun-tumurun, de' ana' tjutju nan kudian.
Pikielah itu de' ang, urang djadi pangulu 'tu, ninie' mama' đe' nan bana, pai ka bakeh batanjo, pulang ka tampe' babarito, ka mamaliharokan ana' buahnjo, akan gubalo patang djuo pagi; bukan gubalo kabau djawi, hanjo gubalo urang banja', talinjo 'adat djuo limbago, akan Mustiko 'Adat 'Alam Minangkabau.
