18
memaliharo kampuang halaman, akan memaliharo harato bando, akan manimbang burue' djo baie', mangatahui mularat djo mupa'at, nan tapantjie awa' nan ka mampakampuangkan, nan badarai awa' nan ka manjusun, baie lahie ataupun batin, samonjo itu tangguangan pangulu balako
Ko' salah buatan awa', binaso ana' kamanakan, binaso korong djo kampuang, malimpah kadalam suku, mularat masue' nagari, namo burue' disabui urang, ana' kamanakan bulieh malu salamonjo. Alangkah susah itu bujuang, urang nan djadi pangulu 'tu?
Kalau tumbueh dikarapatan, tibo dirundieng nan basamo, tantangan 'adat djo limbago, nan dibao kato baïo, usah dirabo-rabo sadjo, ko' lama' djangan dimakan sadjo, ko' pahi' nambe' diluahkan, malainkan djoko' apo-apo bitjaro, nan balun tantu bana ēlo' burue'nso, bao bapikie sakutiko, ko' buliEh sahari duo, timbang mularat djo mupa'at, kadji dahulu awa akie, kamano taalue' kato itu, tantukan bana itu dahulu, kalau burue' akan dibuang, djoko' elo' nan ka dipakai, sabab pitua urang tuo: Adapun kato ado pangkanjo, djoko' angin ado puhunnjo, kalau hudjan ado asanjo.
Pikieri itu dahulu, pikie itu palito hati, tanang itu sarugo aka, pandapē' inda' sakali tibo, pangana tida' sakali datang, kana dahulu djalan surui', mangko ka lalu kahadapan, ba' itu karadjo mangko salamat.
Apo-apo pakaradjaan, tida' djadi diburu sadjo, labieh baie' dangan basanang, ama' dape' djalan nan haluih, bukannjo sanang diam sadjo, hanjo sanang didalam mamikieri: djoko' dibao sanang diam, itu 'alamat ka tjilako: apo karadjo ta' mandjadi, kalau dibao lalai lēngah; malainkan karadjo nan mandjadi, tida'lab buliEh dilupokan, hanjo diburu nan ta' bulieh mandjalang dape' nan salasai. Kalau lah tantu elo' burue'njo, patui' itu disugirokan, ama' lakéh karadjo djadi; mangko ba' itu kato hambo, hambo 'ko urang lah tuo, alah marasai sadja' katjie', alah banja' rupo hambo lie'."
Mandanga kato mama'njo 'tu, tatjanganglah Bagindo Kajo, heran nan bukan alang-alang, sapatah tida' pandai babuni, bagai ditumbue' patuih tungga, pantun dihanta' alu luntjuang, alah kusui' raso pikierannjo, sambie bapikie dalam hati: „Ba' apo iko garan salahnjo, mako ba' itu djawab baliau, sarupo urang tida' suko, mandanga mupakat urang 'tu? Nan dari salamo iko, tida'lah panah nan ba' itu, kalau apo-apo dikabakan, baie burue' atau elo', apo apo mupakat urang, baliau labieh manjukokan, ko' pandjang baliau karë', ko' singke' baliau hubuang, tida'lah ado nan ba' iko, hanjo nan sakali iko, asieng bana djawab baliau, sarupo tida' manjukokan. Apokoh garan salah sili'njo, nan taraso de' baliau, mangko ba' itu kato baliau?
