25
Alah sudah injo bapikie, alah habieh sirieh sakapue, bakato Datue' Radjo Pangulu: „Mano ang Bagindo Kajo, kalau itu kahanda' hati ang. bulieh pulo hambo tarangkan, sado nan dape' de' hambo, didalam 'adat nan tigo 'tu, apo mularat mupa'atnjo, nan ka timbue kamudian, kalau itu kito buangkan.
Tatapi kini ko balun mungkin, sabab hari lah rambang patang, barisue' sadjolah ang kamari, disiko malah makan pagi, amai ang 'kan pai kasawah."
Sadanglah Bagindo Kajo, mandanga kato nan ba'itu, gadang hati bukan kapalang, raso mandape' gunuang intan, baminja'-minja' rupo muko, bagageh sadjo injo mandjawab: „Malah ba'itu kato datue'. barisee' malah hambo kamari."
Sudah bakato nan ba'itu, harilah patang anjolaï, lalu injo sambahjang asa alah sabanta sudah sambahjang, tibo pulo ukatu mugarib, dama tapasang anjolaï, sambahjang mugarib pulo disanan, sampailah pulo ukatu ‘isa; alah sudah sambahjang 'isa. baru pulang Bagindo Kajo, pulang karumah ana'njo, iolah kakampuang Talue' Dalam, disitu kampuang parampuannjo, banamo si Bungo Tjajo, kamanakan Datue' Bandaro Mudo.
Lamo sabanta injo didjalan, sampailah injo karumahnjo, alah lalu bale' sakali, didapati diatēh rumah, nasi lah sudah talata', sarato kopi salangko'njo.
Alah sabanta injo tibo, lalulah makan anjolaï; alah sudah pulo minum makan, dudue'lah injo djo ana'njo, banamo si Bungo Kapēh, batanjo ana'njo kapadonjo: „Paï kamano bapa' tadi, sadja' pagi tida' pulang. hambo lah panë' de' mananti, lah duo kali hambo batana', bapa' ta' pulang-pulangnjo."
Madjawab Bagindo Kajo: „Awa'den kasurau ninie'kau, ado karadjo den disitu."
Mandanga djawab bapa'njo 'tu, diamlah si Bungo Kapēh, tida' injo batanjo lai, hanjolah dudue' mandjahi' sadjo, mambue' solam sapu tangan, batakat djo banang ameh, batabue djo api-api, dilië' djuo de' bapa'njo. Kito-kiro pukue sapulueh, alah tidue si Bungo Kapeh, tiduelah urang samonjo, nan sarumah-rumah itu, surangpun tida' nan tingga laï.
Tasabu' Bagindo Kajo, hari nan samalam itu, sakalo' mato tida' tidde. rintang bapike-pikie sadjo, mamikiekan kato nan tadi, apokoh garan mularatnjo, didalam 'adat nan tigo 'tu, mungko ba'itu kato datue', itu djuo nan dipikienjo; aga' ditjubo dipitjingkan, tida' djuo mato takalo'. Pikieran juo babalie', kira-kiro kakiun sadjo, dinanang djuo dalam hati.
