64
mambari suko hatinjo mandangakan; sarato wadjib djuo kapado urang tuo-tuo, dan tjaradie' pandai itu, akan bakaba-kaba dan mambari-bari inge', kapado sakalian kaum kirabatnjo, apo-apo pakabaran, burue' dangan baie', mantjuritokan kaba-kaba, nan talah lalu dahulu-dahulu, nan dilié' dan didanganjo, dangan manjatokan bakēh-bakēhnjo baie' dan djahat, supajo mandjadi pangadjaran dan paringatan djuo, kapado sagalo ahli-ahlinjo itu, jaïtu kaba-kaba nan babatuelan, dangan kiro-kiro si pandanga. Damikianlah nan wadjib dipakaikan, ulieh urang tuo-tuo dan tjaradie pandai, dan 'arih bidja'sano itu, dan manjigai-njigaikan dirinjo dangan kaumnjo itu, aratinjo djanganlah io mangatokan djuehnjo, dari pado maréka itu, malainkan wadjib io manjatokan hampienjo djuo, supajo batambah-tambah kasieh sajangnjo, kaum kirabatnjo itu, dan murah baginjo malakukan sagalo nasihat-nasihat, dan pitundjue' nan dilakukannjo, kapado sakalian urang itu.
'Adat bakaum bakaluago.
Apabilo ado karadjo dalam kampuang, atau dalam suku atau dalam nagari, misiki karadjo baie', ataupun karadjo burue' (nan dikatokan karadjo baie', karadjo nan manjukokan, dan nan dikatokan karadjo burue' itu baduko-duko, saumpamo kamatian, dan karugian nan tibo-tibo sadjo): kalau suko samo tagala', kalau duko samo manangih, kalau paï karano surueh, baranti karano tagah, aratinjo apo-apo pabuatannjo, handa'lah dangan sapangatahuan pangulu-pangulunjo djuo, sarato urang tuoºnjo, dan sana' sudaronjo nan patui'-patui'. Damikianlah 'adat urang bakaum bakaluago, dan barana' dan babapa', baïpa-babisan baindu-basuku. Itulah nan dipatalikan, dangan 'adat limbago, nan basalue' ure', nan badjumbai aka, balêmbai putjue' namonjo, manjarudue' samo bungke' malompe' samo patah; kalau kaaie samo basah, djoko' kaapi samo latui'. Itulah nan dinamokan samalu sasopan, kalau kakurangan tukue'-manukua', djoko senteng bilai-manibilai, nan barē' samo didjudjuang, nan ringan samo didjindjieng.
'Adat pangulu kapado ana' buah, atéh karadjo buru' djan karadjo baie'.
Apabilo sudah dipulangkan, kapado pangulu djan urang tuo-tuo, barang suatu hal ana' buahnjo, wadjiblah bagi sagalo pangulu itu, ko' kusui' manjalasaikan, nan karueh mandjaraniehkannjo; mahukum dangan djalan ka‘adielan, basarato dangan urang tuo-tuonjo disano.
Adapun nan dikatokan tuo disano, iolah urang nan tjaradie' pandai. urang nan ba'aka djuo, nan akan manimbang burue' dangan baie', tinggi dangan randah, supajo mandjadi salasai, saisi kampuangnjo itu.
