67
lain, mangko dinamoi itu, „ha'njo sadjo", tatapi nan mamiliki urang lain. Itulah undang-undang nan tapakai dalam nagari di 'Alam Minangkabau 'ko nan patui' dahulu ang katahui, tantui bana itu dahulu, sado nan hambo babui' tadi, nan bapakai dalam nagari 'ko, ama' tarang pegangan surang-surang, ama' babēso urang djo awa', baie' djaueh baie' dake'. Ba'itu urang mangadji 'adat; kalau balun tarang nan di awa', djanganlah urang dikatahui, sio-sio itu bujuang, mangadji handa' tinggi sadjo, kalau ta' tarang nan dibawah; ba' nan hambo katokan tadi, pikieri bana sungguh-sunggueh, kalau babilang dari aso, namun mangadji dari alih, ba'itu urang baraka," kato Datue' Radjo Pangulu.
Mandjawab Bagindo Kajo: ..Sagalo nan datue' sabui' 'tu, itulah dalam hati hambo, misiki tida' datue' sabui'kan, itu kan hambo kadji djuo, alah takana itu de' hambo, sagalo nan datue' adjakan tadi, tida' ka lupo de' hambo. Ato hanjo nan kini nangko, mangko hambo maminta' djuo, itu kapado diri datue', nan hambo tanjokan tadi, ĕlo'lah hambo hime' djuo, sabab datue' urang lah tuo, sadang ta' rata' injo lai patjah, sadang ta' saki' urang lē mati, kalau tibo malang di hambo, djandji 'kan tida' tatantukan, antah takalo' pagi-pagi, antah takalo' patang-patang. antah balaku para' siang, kajo Allah siapo tahu, kalau tida' ado datue'. pado siapo hambo maminta', pado siapo hambo tanjokan, namun nan tantang nagari iko, banja' urang nan mangatahui, tida' kan susah manjarinjo," katonjo Bagindo Kajo.
Madanga djawab Bagindo Kajo, tamanuang Datue' Radjo Pangulu, lalu bapikie sakutiko, mamikiekan kato itu.
Alah sabanta injo bamanuang, lalu bakato anjolaï: Kalau itu kahanda' hati ang, bulieh pulo hambo tarangkan, mano nan dapē' de hambo.
Adapun nan ang tanjokan itu, iolah nagari Sungai Tarab, sarato nagari Limo Kaum, dangan nagari Tandjuang Sungajang, tuo ba'apo nagari itu.
Kini dangakanlah de' ang, ama' hambo tjurai hambo papakan, mano-mano nan hambo danga dari ninie' ang, iolah mandiang bapa' hambo, dangan baliau mandiang datue', nan hambo gantikan gala.
Adolah maso dahulunjo, tatakalo sumue ka dikali, nagari akan ditjatja', di 'alam pulau Patjo 'ko, ba' nan lah hambo sabui' dahulu, balun ado urang banagari, hanjolah Pariangan Padang Pandjang, itulah sadjo baru nan ado, nagari dipulau Améh nangko: lain dari pada itu, hanjo lai samato-mato, ado bapulau satu-satu, dimano-mano katinggian, tatapi balun baisi urang, hanjo rimbo bakampuang-kampuang, sarato dangan batu karang, sadang dilamun-lamun omba'.
