78
Mandjawab Datue' Katumangguangan, dangan Datue' Parapatieh Nan Sabatang, sarato dangan isi luha': „Kalau itu kahanda' tuan nang-kodoh, bari djandji kami tudjueh hari, ama' kami tjarikan kabau ka lawannjo." Djadi manurui' nangkodoh itu.
De' urang isi luha', ditjari saikue ana' kabau, nan sadang kue' njo manjusu, dibuē' pulo tupang basi, sambilan banja' tupangnjo, runtjieng nan bukan alang-alang, tadjam saginjo bagai pisau; kunun pandjang tupangnjo itu, adolah pulo anam dapo. Alah sampai djandji anam hari, ditjarai ana kabau tadi, tida' sapaï djo indue'njo, nan samalam-malam itu sampai hari nan katudjueh, dibao kamedan anjolaï, io dikampuang Koto Ranah, banamo kampuang Ranah Batu, di Mēdan Balai Sidasun. Alah datang pulo nangkodoh tadi, dibaonjo kabau nan gadang, urangpun rapē' maso itu, saisi ‘alam pulau Patjo, laki-laki parampuan, akan malië” kabau lago; mamandang ana' kabau itu, tasanjum Nangkodoh Basa.
Alah sampai sa'at kutikonjo, lalu dihiri' katangah mēdan, akan diadu anjolaï; alah basiba' urang banja', dilapēhkan kabau nan gadang, ulieh Nangkodoh Basa tadi, dilapēhkan urang pulo, akan ana' kabau tadi, samo katangah kaduonjo.
Adolah kabau nan gadang 'tu, baru injo dilapēhkan, lalu mamakan- makan rumpui', sabab tida' tampa' akan lawannjo,
Adapun ana kabau tadi, baru injo dilapēhkan, lalu balari injo kasanan, manudju kabau nan gadang 'tu, sarato tibo injo manjusu. kaparui kabau nan gadang 'tu, sabab karano kahausan, alah samalam tida manjusu. Sakali injo manjusu, takadjui' kabau nan gadang 'tu, sabab lah tabue' diparui'njo, lalu basora' urang banja'; duo kali injo manjusu, larilah kabau nan gadang 'tu, basēra'-sera' urang nan banja', Adapun kabau nan gadang itu, sabab karano injo lari, tabularai isi parui'njo, lalu tagole' maso itu, talalu mati sakali. Malie' rupo damikian. djadilah malu Nangkodoh Basa, sabab kalah kabau gadangnjo, diting-gakannjo sagalo isi parahu 'tu, akan pambaie tarueh kabau, injopun pulang maso itu; sabab karano de' bagageh, tingga pulo sangka' ajamnjo. diambie' de' urang kampuang itu.
Sapaningga nangkodoh itu, lah manang ana' kabau tadi, mupakat pulo isi luha', iolah larěh nan duo. Sakato itu kasamonjo, manamoi ‘alam nangko, hanamo 'Alam Manangkabau, *) dahulu banamo pulau Patjo: itu kampuang Koto Ranah, tampë' maadu kabau tadi, dinamoi nagari Minangkabau, itulah namonjo sampai kini, tida' ado barubah-ubah, ba itu tjurai paparannjo.”
*) Disabui' juo Minangkabau.
