32
Indak elok dirantang pandjang
Elok dikumpa naknjo singkek
Diambiak sadjo nan paguno
Tatabua intan dari Pagai
Batjampua-tjampua dengan pudi
Takarang sadjo dalam bulan
Bukan hambo tjadiak pandai
Sungguahpun hambo tagak badiri
Limbago kato disambahkan
Salakehnjo sambah tibo di Sutan sungguahpun Sutan tampek hambo mengumbalikan sambah,nak sa rapeknjolah niniak djo mamak nan gadang basa batuah sarato tuanku nan duo tigo paseloan sarato dunsanak adok adang Bukan hambo maraso malinteh malampau, dihambo tabiknjo pasambahan karano alah saizin kato djo mupakaik disilang nan bapangka nan manatiang mananai paralatan nangko dihambo tabiknjo pasambahan indak taratok tabilang gala dengan alok dimuliakan sambah.
Sambah djo titah nan ditibokan kapado Sutan:lai koh bak adaiknjo urang 'bapantun pakaian kito urang mudo matah :
Tatabua intan dalam pelang
Lagi batabua djo mutiaro
Kiriman Sultan Amarullah
Bajangan malinteh reno bulan
Hilang mangkuto nan sabarih
Susahlah alam djo udaro
Alek dipanggia alah datang
Nan ditjinto alah tibo
Duduak baselo tangah rumah
Sananglah raso pamandangan
Mangutjap sjukur malah kami
Nikmat suko salamonjo
Sultan Sjarif Abdurrazak
Anak tuanku Sjah Alam
