SEKAPUR SIRIEH
Gulamo mudiak ka hulu, kanailah anak ikan tilan, matilah anak bada balang, pusako niniak nan dahulu, lai babunuah bakanakan, kini manjadi undang-undang. Elok ranahnyo Minangkabau, rupo karambieh tinggi-tinggi, cando pinangnyo lingguyaran, rupo rumpuiknyo ganti-gantian, Bukik baririk kiri-kanan, Gunuang Marapi Singgalang, Tandikat jo Gunuang Sago, Pasaman jo Gunuang Talang.
Pudiang ameh batimba jalan, baringin manangah koto, labuah lurui jalannyo goloang. Sawah batumpak di nan data, ladang babidang di nan lereang, banda baliku turuik bukik, cancang latieh niniak muhang, tambilang basi rang tuo-tuo. Sawah lah sudah jo lantaknyo, ladang, lah sudah jo ranjinyo, sawab balantak basupandan, ladang diagiah bamintalak, padang dibari baligundi, rimbo diagiah bajiluang, bukik dibari bakaratau. Ka ateh nyato taambun jantan, ka bawah nyato takasiek bulan, niniak-mamak punyo ulayat, hak nyato bapunyo,ganggam nyato bauntuak.
Rumah gadang basandi batu, sandi banamo aluah adat, tonggak banamo kasandaran. Atok ijuak dindiang baukie, gonjoang ampek bintang bakilatan, banamo rabuang mambucuik timah mamutiah di atehnyo. Tonggak gaharu lantai cindano, tarali gadiang balariak, bubungan burak katabang, tuturan labah mangirok, paran gamba ulangiang, bagaluik rupo ukia cino, salo manyalo aia perak. Anjuang batingkek baalun-alun, tampek manyuri manirawang, paranginan puti disanan, limpapeh rumah nan gadang, sumarak dalam nagari, hiyasan di dalam kampuang, umbun puro pegangan kunci, pusek jalo kumpulan ikan, nan disabuik “Bundo Kanduang”.
Barih balabeh Minangkabau, satitiak nan pantan hilang, sabarih nan tidak lupo, jauah nan buliah ditunjuakkan, dakek nan buliah dikakokkan. Nan salilik Gunuang Marapi, nan saedaran Gunung Pasaman. Dari sirangkak nan badangkang, sinan buayo putiah daguak, sampai ka pintu rajo hilia. Durian ditakuak rajo, Sipisau-pisau anyuk sialan balantak basi, dakek aia babaliak mudiak. Sailiran Batang Bangkaweh, sampai ka ombak nan badabuah, hinggo lawik nan sadidih, sahinggo Sikilang Aia Bangieh. Pasisieh Banda sapuluah, hinggo taratak batu hitam, sampai ka Tanjuang Simalidu.
3
