nan bagai bak disapuah, halui nan bagai bak dibanang, kato nan datang dari Datuak, kato datang batarimokan, sambah lalu diparamulia, dek rumah barajo kali, karano kampuang ado nan tuo, rumah nan ado batungganai, diambiak kato baiyo, dilatak dibarih bana, disimpan dalam limbago, mananti malah Datuak sakutiko, sakian sambah pada Datuak.
JAWAB SI PANGKALAN
Lah sampai dek angku Datuak. Sapanjang rundiangan Datuak, nan talimpah kapado kami, nan taserak ka tangah rapek, sudah maalum dalam hati. Kok mamahek alah dalam barih, lah manuruik ukua dengan jangko, nyato di dalam bariah balabeh adat, dalam kanduangan adat jo pusako, manuruik cupak jo gantang, jalan nan pasa lah baturuik labuah goloang nan datuak tampuah. Nan sakarang iko kini, limbago tumbuah lai basiang, jatuah lai batengok, dek baiyo duduak basamo, karano mufakat duduak barapek, nyato di dalam adat kito, Datuak baiyo samantaro, mancari rundiangan saukua, kami mananti sakutiko, kami pakai adat demikian, kami pakai sifat mananti.
JAWAB SI ALEK
Ma Datuak... Sambah kambali kapado Datuak. Sambah Datuak na talimpah kapado kami, kok gayuang mintak disambuik, kato mintak dijawek. Manuruik adat jo pusako, lah dipaiyo-patidokan, lah dipakai ukua jo jangko, jo niniak-mamak penghulu nan hadiako. Dek duduak baduo jo batigo, duduak basamo jo nan tuo, penghulu mapek jo limo, talalai sambah kambalinyo, maaf dimintak pado Datuak. Lah dipandang jo mungkin patuik, jo alua naraco adat, ditilick barih balabeh, kok jurui lah makan tiliak, bantuak dimakan siku-siku, lah di aia lapeh tubo, lah diukua makan karek, lah tantang sakik lake ubek, lah dinan tumbuah kito basiang, lah tantang ado kito manimbang.
150
