Hanyo baa to hanyo lai, tantang carano nan katangah, nan tahadok ka muko kami, panuah barisi kalangkapan, barisi siriah dengan pinang, sarato sadah dengan gambia cukuik timbakau di atehnyo. Nan manuruik pintak Datuak, kok siriah sacabiak mintak bakunyah, pinang sadidih nak bagatok, sadah dicupu nak bapalih, gambia sabuah nak bapipiah, dipalik jo jari manih, dibeleang kajari malang, mancayo ka tapak tangan, sirahnyo tampak di bibia rasonyo maruang tubuah, tando samo basuko hati. Kan baitu bana kato Datuak? Kok hanyo tantang di sinan, lah jadi tangguangan kami, nan bak kato bida adat: Kok lai bak kato papatah, lahiah jo batin saukuran, isi kulik umpamo lahiah, ganggam arek pegang taguah, tibolah lukih di limbago, habih sirih manjadi sapah, kaleknyo tingga di rangkuangan, pariso maruang tubuah sehat anggota katujuahnyo. Sirih sacabiak lah kami gatok, sadah dicupu lah bapa lik, gambi sabuah lah bapipiah, lah kasanang hati Datuak.
JAWAB SI PANGKALAN
Ujuik kato buah rundiangan, nan talimpah kapado kami, buni lah sama kami danga, rupo lah samo kami liek, lah jinih bana bak dibasual, lah tareh bak ditampi, lah nyato lakang dari kulik, lah nyato gugua dari tampuak, nan bak kato gurindam dalam adat: Nak ulam pucuak manjulai, nak aia pincuran tabik, kok nak cincin galang lah buliah, nak cayo kileklah datang, nak haluih licin lah tibo, salasai rundiang di nan elok, ka jadi sasi bungo jo daun. Adat bajalan sandirinyo. Sananglah hati niniak-mamak, suko hati ibu jo bapo, gadang hati ka samonyo. Kok data lah balantai papan, licin nyato balantai kulik. Suni di dalam kiro-kiro.
Sakian jawabnyo pado Datuak.
151
