Bab VI
Pidato Maantakan Marapulai
Datuak...pado Datuak tibonyo sambah. Sungguahpun Datuak surang nan disambah, tagak dek adat jo pusako, dek barih cupak jo gantang, dek alua Datuak kasamonyo, ambo kan mandatangkan sambah.
Adopun sambah nan ka ditunggangkan kapado Datuak, kalau basian di nan tumbuah, jikok manimbang di nan ado, tumbuah sarupo iko kini.
Sandi undiko dalam kampuang, Datuak tampuak tangkainyo, inggiran silang jo salisih, kusuik di Datuak salasinyo, karuah di Datuak ka janiahnyo, ibarat diri badan Datuak, kayu gadang di tangah padang, baurek limbago matan, kabatang sandi andiko, badahan cupak jo gantang, barantiang barih balabeh, badaun rimbun dek adat, babungo mungkin jo patuik, babuah kato nan bana. Bulih baselo di ureknyo, bulih basanda di batangnyo. Gantuangan cupak nan duo, partamo cupak usali, kaduo cupak buatan. Nan dikatokan cupak usali, nan sakundi-kundi yo, nan sapantiang tali bajak, kupang jo ameh masuak pulo, nan ganok duo baleh taiah, dikikih bahabih basi, dibasuah bahabih aia dianjak indaknyo mati, dibubuik tak mampuah layua, itu nan dikatokan cupak usali. Nan tasabuik cupak buatan, nan batapuang kapuah jo sadah, balicak pinang jo gambia. Sasuai mangko manjadi, saukua mangko takanak. Kok datang hujan jo paneh, batiuik angin jo ribuik, sabarih bapantang hilang; satitiak tak namuah lupo.
Lah janiah cahayo adat, lah tarang bangun pusako, bak rumpuik ditimpo rinyai, musim pabilo lipuanyo.
Salangkah turun dari janjang dari tanggo rumah kampuang etan, barih tabantang kami turuik, labuah nan goloang kami tampuan, masuak ka joroang kampuang Datuak.
152
