Kok tibo alah baduduakkan, lah taunjuak sirih dicarano, tando lah sudah minum makan. Nan sakarang iko kini, pihak diri marapulai, lah duduak di ateh rumah, duduak di ruang rumah nan gadang, di lingkuangan niniak jo mamak, di hadapan ibu jo bapo, sarato ipa dengan bisan, cukuik jo urang mudo matah, lah duduak basandiang duo, nan bak bulan jo matohari, bintang kujarah manguliliang.
Kok tumbuah di tangah rumah, ka jadi adat bijo nan baiak katungkek pamani jalan, kakarih pemaga diri, dalam adat-baradat pulo. Kok elok ratak tangannyo, panjang bao kamangarek, singkek bao kamauleh, senteang bao kamambilai. Kok elok ratak lidahnyo, kusuik bao manyalasai, kok karuah dapek mampajaniah, kok ka hilia samo ka hilia kok ka mudiak samo ka mudiak.
Tapi samantang pun baitu, pihak marapulai, raso manetek niro pinang, antan baraia antah tidak, nan bak alu patah talimpo musim pabilo kan bataruak, ibo nan bak padi salibu, awak tumbuah musim talampau, urek tagantuang kajurami, rangkiang tinggi nan dicinto, supayo Datuak tarimo elok-elok, iyo di dalam tapak tangan, sakian sambah pado Datuak (Sutan).
JAWABNYA
Lah sampai dek angku Datuak (Sutan), iyo dek kami si pangkalan, alek jamu dalam pangkalan, sambah taunjuak kanan rapek, titiah tatabua kanan banyak, kapado Datuak ka sadonyo, sarato alek nan datang, nan dilingkuang dindiang di tapi, nan saedaran bandua di tangah. Tantangan rundiang nan ka tangah itu tadi. Datuak (Tuan) lah babandoang datang ka mari, turun dari tanggo kampuang etan, arak iriang lah sapanjang jalan, arak iriang ka kampuang Datuak, atau ka budi caniago (nama kampuang perempuan).
Aguang jo calempoang jadi tapuang, sorak jo sorai jadi bungo, salatui badia pusako, tagak marawa bungo adat, baguguah tabuah larangan, larangan Datuak nan basamo, masuak loroang kampuang Datuak, duduak lah lamo taselo, di ateh rumah tanggo iko.
Pado katiko iko kini, lah ampek adat nan bapakai, pertamo sambah- manyambah, kaduo baso jo basi, katigo siriah jo pinang, ka ampek minum jo makan. Nan dikato sambah-manyambah, ganti mulia-
153
