Bab IX
Sambah Mangaluakan Jamba
(sesudah selesai minum-makan)
Maa Angku Datuak . . . sambah tibo pada Datuak. Sungguahpun Datuak surang nan taimbau, nan dilingkuang barih di tangan, nan salirik banduah di tapi, nan ditani lantai disaok atok, batin di dalam rumah jo tanggo iko kini. Dek awa kato nan sapatah, salam tajelo di nan apek, kato tatabua di nan banyak, sambah di Datuak ditimpokan.
Ujuiknyo sambah nan taunjuak, nyato tawalak ka ukuaran, tabayang barih balabeh, bana bak andai kato bida, dek curiang barih dahulu, dek pusako cupak jo gantang, kalau manimbang di nan ado, jokok basiang di nan tumbuah, nan bak kato bida adat, mangauak sahabih gauang, mahawai sahabih raso, abih dayo badan talatak, tibo paham aka baranti, kato pun putuih sandirinyo.
Tapi samantang pun baitu, ditiuik api di karang, disalai palito alam, banamo colok malayu, tarang nan bagai bulan panuah, mancayo ka utak-banak, sajuak anggoto katujuahnyo. Sabab lah sudah minum- makan, karano iyo baitu, diputa bak cando cincin, dikisah bak cando subang, edang juadah nan ka tangah, dialieh ka padapuran, itu nan jinih sambah kami, kato diharap dibunisi, sakian sambah pado Datuak.
JAWAB SI ALEK
Sambah nan datang dari Datuak (Sutan)... lah nyato di dalam bana, kalau dilayangkan pandang ka nan jauah, ditukiakkan pandang ka nan ampia, diereangkan pandang ka nan rusuak, lah tibo mungkin jo putuik, lah nyato manuruik alua. Kalau di runuik ka pidoman, tando
159
