Bab X
Sambah Makan II
Tumbuah sarupo iko kini tuak. . . hutang dek diri si pangkalan, iyolah silang nan bapangka, dek karakok nan bajunjuang, minum- makan disadiokannyo. Jikok salorong tantang itu, nan bak pituah Datuak juo, adat limbago dilawikkan, pakai pidoman jurumudi, nan tahu di pasang turun-naiak, tahu di ombak nan basabuang, iyolah badai rang namokan.
Dek pandai janang manatiang, tahu digarak dengan raso lah tadanga piriang babuni, iyo di dalam padapuran, lah ditiliak lah dipandang, cukuik baisi cawan pinggan, tagak badiri bujang nan janang, tangah manatiang ka ruangan selo, takanak kupiah di kapalo, lakek sampiang tanun Arab, Bugi Makasar rang namokan, manatiang nasi dengan gulai, jawek-bajawek candonyo piriang, lego-balego si cawan gulai, nan bak santono paja tabantang, teko gadang mamacah ruang, cangkia ketek babilang tangan, heranlah mato mamandangi.
Nan bak umpamo bintang di langik, santono ombak dilawikan, pihak kapado susunannyo, di tangan awan bajomba, di tapi samuik baririang, nago bajoak kiri-kanan, barisi langkok kasadonyo. Limbak nan daripado itu, aluran nasi nan ka tangah, jikok diliek dimanuangkan, asa malo dahulunyo.
Padi seranak rambun tulang, tumbuah di pandang patapaan, iyo di lireang ka dataran, dijamua dek puti linduang bulan, hari paneh jamua balingkuik, hari ujan jamu takaka, masiak dek singa paneh patang, masiak nan bukan alang-alang. Lalu ditumbuak jamua kakincia, etan karanah bungo tanjuang, iyo ka lurah sungai janiah. Jikok dicaliak candonyo kincia aia gadang banda batumbuak, bak umpamo si anak roda, bapaliang tingka-batingka, buni alu sahut-sahutan, bak cando
161
