Bab XI
Pasambah Manjanguak
Orang Mati
Sambah tibo pada Datuak (Sutan), sakali ambo maimbau indak basibak jo basisieh, gadang indak basabuik gala, ketek indak basabuik namo, batinkek adat kasamonyo. Penghulu nan gadang basa batuah alim ulama jo tuangku, bilal ulama imam katik, nan mamegang soko dalam adat, hulu balang jo ampang limo, ibu-bapo manti pagawai, nan mudo arieh budiman, ambo akan mandatangkan sambah.
Indak dapek sarimpang padi, batuang dibalah kaparaku, indak dapek bak kandak hati, kandak Allah juo nan balaku. Pihak nan diri mandiangko, lah singkek umua lah panjang langkah, lah putuih pandang ka bumi, lah pulang pandang akhirat, kok gantangnyo sudah lah panuah, bilangan sudah lah cukuik, nan punyo datang manjapuik, nan batanam datang membubuik.
Itulah sabab karanonyo, mangko dikaluakan balam diserakkan padi, ditiokkan malam, dibilangakan hari kok harinyo lah sakian... jo hari cako, kok malamnyo lah sakian jo malam kini. Dek adat Datuak dalam nagari, kok sakik alah basilau, kok mati alah bajanguak, kok nan elok bahimbaukan, nan buruak lah bahambuan, alek bapanggieh mati nan bajirambok. Dan pangasiah dek panyanyang, Niniak-Mamak jo Tuangku, sarato urang nan banyak, lah dibacokan kaji jo tahalil, sarato Patihah diatehnyo.
Hanyo baato hanyo lai, tantang diri si mandiangko, lamo hiduik banyak dirasai, jauah bajalan banyak diliek, kok ado hutang siriah, hutang pinang, kok salah jo kilapat, kapado kito nan basamo, iyo nan babari maaf, dari muluik sampai ka hati, dari dunia lalu ka akhirat, sakian sajo sambah pado Datuak (Sutan) ...
Marabah sadundun jo balam, sikok baulang pai mandi, sambah sajundun dengan salam, salam diharap nak kambali.
164
